Shillong, Naiwieng 2 : U Pulit Ophisar uba dei mynshwa u Assistant Inspector General (AIG) (A) u bah G.K Iangrai uba la shah kem mynta ka sngi Balang ha ka Special Investigation Team (SIT) jong ka tnad CID na la ïing jongu na Lumshyiap, Golflink, un shah sospon na ka kam, ong u Symbud Myntri Rangbah bah Prestone Tynsong.
U Symbud Myntri Rangbah ula ong ba ka sorkar kam don lad shuh da kumwei pat hynrei ban shu sospon beit hadien ba la dep khynra ïa ka ïing jongu bad kem ruh ïa u da ka kynhun SIT.
Hadien ba la paw pyrthei ki kam bamsap ha kaba ïadei bad ka jingtei ïa ka National Emergency Response System (NERS) PSAP ha Sadar PS Complex, la shimti ïa ka jingtohkit da ka tnad Crime Investigation Department (CID) bad rejister ïa ka case ha ka kyndon Prevention of Corruption Act ha ka 28 tarik Risaw. Hadien kane la thung ïa ka kynhun Special Investigation Team (SIT) kaba la khlieh da u DIG (Eastern Range ) bah Devis Marak.
U Bah Prestone u la ong kumba la kem ïa u da ki bor pulit kumta ka aiñ kan sa leh ïa kaba donkam pat. “ Ngim don shuh da kiwei ki lad ki lynti hynrei hap ruh ban sospon noh ia u. Ai ba ka aiñ kan leh ïa kaba donkam tad haduh ban da dep lut nadong shadong ka jingtohkit bad ngin sa peit kaei kaba dei ban leh namar ki pulit ruh ki leh ïa kane ka kam mynta ka sngi da ka lynti jongka aiñ” ong u Symbud Myntri Rangbah.
Halor ka jingkylli hato ka sorkar kan aiti ïaka jingtohkit sha ka CBI,u bah Tynsong ula ong “ Phi dei ban sngewthuh namar wei ba la leh ïa ka kam da ka tnad ba dei ban leh, kaba bud kan long kat kum ka lynti jongka aiñ. Phin kynmaw ruh ba ïa kane ka kam la shim khia bha ruh wat da ka ïing bishar High Court jongka jylla kumta kiei kiei baroh kin long kiba shai bad ryngkat ki jingthoh jingtar kiba skhem”.
