Ka NPP ka la pyndonkam bakla ïa ki skim sorkar kum ki skhim ka party naka bynta ka election : Hek

0

Shillong, Naiwieng 02 : U dkhot ka National Executive jong ka BJP bad ruh u MLA jong ka party na Pynthorumkhrah, Bah AL Hek ha ka sngi Palei u la kynnoh ba ka NPP kaba ïalam ïa ka bor synshar ba ka pyndonkam bakla ïa ki prokram bad ki skim jong ka sorkar na ka bynta ka jingmyntoi politik jong ka.
Haba kren bad ki lad pathai khubor, u Bah Hek u la ong ruh ba u la ïohi ba ha kine ki arsnem lai snem bun ki prorkam jong ka sorkar ki la paw pynban kum ki prokram jong ka NPP.
“Kylleng kylleng ha baroh ki prokram jong ka sorkar ki la kylla long ki prokram jong ka political party. Kumno ki lah ban ong ba ki kam jong ka sorkar bad ka pisa paidbah ka dei jongka political party? Ki la pyndonkam bakla ïa ki prokram jong ka sorkar,” u la ong.
Utei u MLA jong ka Pynthor u la ong ruh ba u la ïohi ïa kane ha ka prokram kaba u leit ban shim bynta kum u Myntri ka Koit ka Khiah ha ki snem ba la dep ha Mawryngkneng.
“Haba ngi poi hangtei, ngi ïohi kumba kadei pynban ka prokram jong ka NPP namar la buh ki lama bad ki jingthoh jong ka NPP. Nga dei u Myntri ha katei ka por bad kumta nga la ong ba ka prokram ka long kaba seisoh hynrei ka shah rem noh tang namar ka jingrwai,” u la ong da kaba kdew ba ha ka jingrwai la kdew tang ïa ka NPP.
Shuh shuh u ong ruh ba halor katei ka jingjia wat na ka liang u MLA bad Myntri ha ka sorkar jylla, Bah Banteidor Lyngdoh ruh u la kren pyrshah ïa kajuh ka jingshem.
Kumta halor kane, u la ong ba shen kin sa rah ïa kane ka ishu ha ka jingïalang jong ka Meghalaya Democratic Alliance.
“Ngin hap ban rah beit ïa kane ka ishu namar lada kren naduh ka ishu ki nongrep, ka jingsam ïa ki khun sniang bad kiwei kiwei ki skim la leh lut bad pynkylla kum ki skim NPP,” u la bynrap biang.

Leave A Reply

Your email address will not be published.