Shillong, Naiwieng, 02: Ka Helicopter kaba kit ïa u Myntri Rangbah ka Jylla u Conrad Kongkal Sangma na Tura sha nongbah Shillong ka la hap ban hiar khyndew kyrkieh ha ka sngi Balang ha madan jong ka UCC College, Umïam Ribhoi District na ka daw ka jingthud jong ka suiñ bneng.
Katkum ka thymmei khubor ba la ïohlum na ka ophis u Myntri Rangbah, la ong ba u Sangma u la mih na Tura ban wan phai sha Shillong hadien ba la kut ka prokram kaba la long ha West Garo Hills District.
Ryngkat lang bad arngut ki Pilot, kane ka helicopter kaba ngiam san ngut ki nongleit jingleit, ba la pynïaid da ka Aryan Aviation Private Limited Company ka la hiar khyndew kyrkieh ha madan jong ka UCC College, Umïam.
Hadien ba la hiar khyndew ka Helicopter, u Myntri Rangbah u la leit jngoh ïa ka UCC College bad ïakynduh ïa ki nonghikai bad ki nongtrei. Hadien kane u la leit ban bamja ruh ha ka Canteen jong ka College.
Nangne u Myntri Rangbah u la wan phai sha Shillong da ka kali.
Ha ka rynsan Twitter u Myntri Rangbah u la thoh, “hadien ba la hiar khyndew kyrkieh ha UCC College, Umïam na ka daw ka jingthud jong ka suiñ bneng na ka jingwan phai na Tura hynrei nga la ïohlad ban leit jngoh ïa ka itynnat jong ka phyllaw ka college bad nga la pynlut por ruh katto katne bad ki nonghikai jong kane ka College.”
