Nongpoh, Nailur 02: Na ka bynta ka jingshgaiñ ki paidbah bad ruh ban pyntreikam katkum ki kyndon jong ka Motor Vehicle Act, ka tnad Transport lyngba ka ophis u District Transport Officer ka Ri Bhoi ka la pyntip ba na ka liang ka ophis kan sa pynlong ïa ka jingtalasi naphang ïa ki Kali naduh ki Kali kamai paidbah haduh ki kali ki riew shimet shi bynta ban ïada na kino kino ki jingjia ba sngewsih kiba dei na ka jingpynkheiñ ïa ki kyndon aiñ ñiah kali.
Katkum ka kyrwoh ba la phah da ka ophis u District Transport Officer ka Ri Bhoi, u Bah I. Kharmon la ong ba ka ophis jong ka tnad Trasnport shuwa ba kan pynlong ïa ka jingtalsi ne ka jingkhynra ïa ki kali kamai bad ki kali paidbah ka la pyntip lypa ba ki trai kali ki dei ban pynbiang ïa ki kot ki sla bad ruh ban bud ryntih katkum ki kyndon jong ka Motor Vehicle Act.
Katei ka kyrwoh ka la pyntip ruh ba na ka liang ka ophis lyngba ki bor ba dei peit kin sa pynlong ïa ka jingkhynra kot khynra sla ha baroh ki bynta jong ka Ri Bhoi bad kum ka jingpyntip ki paidbah ki dei ban pynbiang lypa ïa ki kot ki sla bad lada lap ba kim don ïa ki kot ki sla kin shah pynshitom katkum katei ka kyndon jong ka Motor Vehicle Act.
La ong ruh ba kane ka jingkhynra ka dei ruh ka jingkhynra naduh ki kot ki sla jong ki Kali kamai paidbah bad ki kali ki riew shimet ba ki hap ban pynbiang ïa ki kot ki sla jong ki kali khamtam ki Kali kamai paidbah ki hap ban don ïa ka permit ban kamai bad ki Kali ki riew shimet ruh kin nym lah ban kamai kum ki kalai kamai paidbah kiba la ioh da ka permit.
La pynpaw ruh ba kane ka jingkhynra ka dei ruh naduh ki Permit, ki License, kiba ym deng helmet bad kiba ym deng Seat Belt namar bun ki Kali paidbah ki la pynkheiñ ïa ka kyndon jong ka Motor Vehicle Act.
Shuh shuh, katei ka kyrwoh ba la phah da ka ophis u District Transport Officer ka la mana ruh ïa baroh ki kali naduh ki Kali kamai paidbah haduh ki Kali ki riew shimet ba kim dei ban pynkheiñ ïa ki kyndon aiñ ñiah kali bad lada lap ha katei ka jingtalasi ne ka jingkhynra ïa ki kot ki sla kin shah pynshitom beit katkum katei ka kyndon jong ka Motor vehicle Act, ong ka kyrwoh na u District Trasport Officer ka Ri Bhoi, u Bah I. Kharmon.
