Yn khot da ka Dorbar kyrpang ki Dolloi, Ki Waheh Shnong bad ki riew shemphang ban ïada ïa ka Wah Myntdu

Jowai, Rymphang 04: Ka Khooid Ya Ka Myntdu mynta ka sngi 3 tarik u Rymphang kala pynlong ïa ka jingïalang ban wanrah ïa ki jingmut na ka bynta ka jingbha jingmiat jong ka Wah Myntdu kaba la long ha Iungwalieh ka Chilliangraij, Jowai.
Ha kane ka sngi la wan ban ïadonlang naduh ki riew rangbah, ki longkmie, ki khun samla shynrang bad kynthei jong ka sor Jowai kiba don shisha ïa ka mynsiem ban ïada ïa ka wah Myntdu ha kine ki sngi ban wan. U Khroo Lamsalanki Pariat, President KYM uba pynïaid ïa ka jingïalang ula ai ki kyntien pdiang sngewbha ïa baroh kiba wan sha ka jingïalang bad ula pynsngew ïa ka jingïaid lynti jong ka seng ban ïada ïa ka Wah Myntdu da ka jingïatrei lang bad ki bor sorkar katkum ki kyndon ka NGT.
Hadien kane ka jingpynsngew kiba bun ki nongwan sha kane ka jingïalang kila shim bynta lang ban ai jingmut halor kumno ban wad ki lad ki lynti ban pynkhlaiñ shuh shuh ïa kane ka seng KYM lyngba ki rukom treikam jong ka.
La ai jingmut ruh ban pynlong daki prokram pynsngewthuh ïa ki nongshong shnong ha manla ki dong ki shnat kiba long ruh kum ki trai shnong ba shong basha ha talawiar ka Wah Myntdu ba kin don ka jingkitkhlieh ïa kane ka Wah kaba long ka nongbsa umbam ïa ka sor Jowai.
Ha kane ka sngi kala mih ka sur ba kin khot daka Dorbar Kyrpang naduh ki Dolloi, ki Waheh Chnong, ki Secretary Chnong, ki dkhot ka Executive Dorbar bad ki riew shemphang kiba don ka jingkitkhlieh ïa ka Wah Myntdu ka ban long haka 17 tarik u Rymphang, 2024. La kyntu ïa kino kino kiba don jingkitkhlie ïa ka wah Myntdu ba kin rung kum ki dkhot ban ïatreilang bad kane ka kynhun Khooid Ya Ka Wah Myntdu (KYM).