Mawkyrwat, Rymphang 04: Ka Seng Samla Shnong Mawpharkhrew (SSSM) kum ka dak jong ka jingkmen ba ki samla kynthei ki la wanrah burom ha ka jingïalehkai volleyball jong ka Women Volleyball jong ka 5th Meghalaya Games kaba la long ha Tura ka la pynlong ïa ka prokram pynkup burom hapoh Resources Center, Mawranglang Lai-Kyntoit, South West Khasi Hills District.
Lah ban kdew ba ka jingwanrah burom jong ki kam dei tang ïa ka shnong ka thaw hynrei khamtam ïa ka South West Khasi Hills District ba ki ki la mihkhmat ha ka Women Volleyball jong ka 5th Meghalaya Games ha Nongbah Tura, West Garo Hills District.
Ha kane ka program na ka liang jong ka Seng Samla Shnong Mawpharkhrew, South West Khasi Hills District ka la ïoh ban pynkup burom kyrpang ïa ki samla kynthei kiba la ïoh ban khur ïa ka takma ksiar ne gold medal ha ka 5th Meghalaya games kaba la long ha Nongbah Tura ha kiba ki samla kiba la leit ban ïashimbynta ki kynthup ïa ka Wansukshisha Nongsiej, ka Merisha Nongsiej, ka Balapynkmen Nongsiej, ka Lawanjanai Nongsiej, ka Kyrmenshisha Nongsiej bad ka Baiadalin Marweiñ.
Ha kajuh ka por la ïoh ban pynlong ruh ka jingïakop kyntip ne ka quiz na ka bynta ki khynnah kiba 16 snem shapoh ha kaba ki nongjop ki long ka Kyntiewdorlin Nongsiej ka la wan ha ka kyrdan ba nyngkong, u Arkitshwa Marbaniang ha ka kyrdan ba ar bad u Kyrmenlang Nongsiej ha ka kyrdan ba lai.
Haba kren ha kane ka program u bah Rickystar Nongsiej bad u Lumlangkyrhai Nongsiej kum shibynta ban ai mysiem na ka bynta ki para samla kynthei ba kin nang ïai trei shitom kumba ki la ïoh ïa ka jingjop bad kyrmen ruh ba kin nang ïai trei shitom khamtam ha ka sap kaba U Blei Ula ai na ka bynta jong ki, la pynpaw i samla Lumlangkyrhai Nongsiej. Ha kajuh ka por la ki la pynpaw ruh ïa ka jingaimynsiem na ka bynta ki para samla jong ka shnong ba ka seng samla haba ka pynlong ïa kane ka program ka pynlong khnang ban kyrsiew bad ban kyntiew lang ïa baroh ki samla kynthei ne shynrang jong ka shnong ban trei shitom lada ki trei ha kino kino ki kam kiba ngi dei ban pyndep la ong u bah Lumlangkyrhai Nongsiej.
Ha kane ka program la ïadonlang ki dkhot kiba hakhmat jong ka seng samla ryngkat ki para samla ki longkmie ki long kpa kynthei bad shynrang jong ka Shnong Mawpharkhrew.
Na ka liang jong ka Seng Samla Mawpharkhrew ka pynpaw ruh ïa ka jingkhublei na ka bynta ki para shnong kiba la ïa wan ban pynshngaiñ ha kane ka program kaba kyrpang jong ki samla kumjuh ruh ia ki kynnah kiba la ïa shimbynta shit rhem ha ka jingkylli jingtip.
