Yn ioh tih mawshun bad dew byrthah suk ka Kopeni dewbilat namar bym don ba pyrshah

Khliehriat, Naiwieng 21: Lehse kan dei ka sien ba nyngkong eh ha East Jaiñtia Hills District bad ha ka jylla hi baroh kawei ba ym don mano mano ba pyrshah ha ka jingpynlong public hearing jong ka company M/s Goldstone Ltd ba la pynlong mynta ka sngi ha ka jaka hajan ka company Glodstone ha East Jaiñtia Hills District.
Kane ka jingpynlong ïa ka jingpynsgew paidbah lane ka public hearing jong katei ka company dewbilat M/s Goldstone Ltd mynta ka sngi ka la ïaid beit khlem don mano mano ba pyrshah bad baroh khatsaw ngut kiba ai jingkren halor rynsan ki ai ka jingkyrshan ïa katei ka company kaba thmu ban sdang ïa ka jingtih ïa u mawshun bad ban tih ïa u khyndew byrtha na shnong Umtyra bad na shnong Chiehruphi na ka jaka kaba heh kumba 6.7892 Hecter.
Katkum ka jing batai u Environmental Engineer MSPCB, u bah F.Laloo, la ong ha ka company ka thmu ban tih 3,58,369 lak ton (TPA) u mawshun ha ka shi snem, 1,21,909 lak ton(TPA) ka khyndew byrtha ha ka shi snem, shyiap 67,622 TPA bad ka khyndew shyiap 47,279 TPA ha ka shi snem.
U Doloi jong ka elaka Narpuh, u bah Manbha Kyndoh, u waheh shnong Chiehruphi, u bah Phrom Rymbai, u Boundary Secretary Elaka Rymbai, u bah Balios Swer, Waheh Shnong Ratacherra, u bah D.Pohshna, u Waheh Shnong Pyrtakuna, u bah Love You Bareh bad baroh kiba ai jingkren ki la ai ka jingkyrshan ïa ka company Goldstone kaba thmu ban tih ïa u maw shun bad kumjuh ruh ban tih ïa u dewbyrtha na ka par kaba don ha kitei ki shnong kata ha Chiehruphi bad ha Umtyra.
Na ka liang ka East Jaiñtia Hills Truct Owner Association ka ai ka jingsngew nguh ïa ka company Goldstone kaba la ai lad ha ka kamai kajih îa ki paidbah ka thaiñ, kaba la ai ruh ka ai jingkyrshan khamtam ha ki kam trok ha ka kit ka bah, ka ai ruh ka jingkitbok kitrwiang ïa ka company.
Kiba bun na kiba ai jingkren bad kiba kyrshan, ki kyntu ïa ka company Goldstone ba kam dei pat ban iaid lait na ki kyndon ïada mariang bad ka dei ban pyntrei ha kata ka rukom ban nym pynjot ïa ka mariang, ha kajuh ka por ki kyntu bad kyrpad ruh ïa ka tnat Meghalaya State Pollution Control Board ba kan sngewbha ban ai ïa ka syrnot lane ka Clearance Certificate ïa ka M/s Goldstone Ltd ba kan ioh ban tih ïa u mawshun bad ruh ban tih ïa ka khyndewbyrtha na ka par kaba don ha Cheiruphi bad ha Umtyra.
Kiba la ai jingkren ki kynthup ruh u Waheh Shnong Moosiang Lamare, u bah Lumlang Muksor, u Finance Secretary Elaka Narpuh, u bah Jerimaia Dhar, Spoke Person EJH Truck Owner Association, u bah Soomiyeo Sayoo bad kiwei kiwei.
Ïa ka public hearing la pyniaid da u Environmental Engineering MPSCB, u bah F.Laloo, ha ka jingdon ryngkat lang u ADC ka East Jaiñtia Hills District, u bah G.Warjri, MCS bad u Environmental Engineering MPSCB, u bah James Lamurong.
Ha kaba iadei bad kane ka project ban tih mawshun bad ban tih khyndew byrtha, la ioh ruh ka jingpysnhai na ka liang ka company Goldstone Cement Ltd, lyngba u Consultant, u Aarya Chowdhury.