Shillong, K’lyngkot, 16: Ka North Eastern Council, Shillong kan pynlong ïa ka jingïalangbah kaba shi sngi ha ka 19 tarik mynta u bnai ha State Convention Centre, Shillong.
U Chairman jong ka NEC u Amit Shah uba long ruh u Myntri ka tnat Kam Pohing ka ri un sa pynïaid ïa ka jingïalang. Ha kane ka sngi, yn sa ïashim bynta lang da u Myntri ka DoNER, u G. Kishan Reddy uba longu Vice-Chairman jong ka NEC bad kynthup ruh u Myntri Khynnah jong ka DoNER u B.L. Verma lem bad kiwei kiwei ki heh ophisar jong ka tnat DoNER bad NITI Aayog na New Delhi
Baroh ki Lad bad ki Myntri Rangbah jong ki Jylla ka thaiñ Shatei Lammihngi bad kynthup ruh ïa ki Chief Secretary bad kiwei kiwei ki heh ophisar kin sa ïashim bynta ha kane ka jingïalangbah.
Kiwei kiwei ki tnat treikam ba kynthup ïa ka Assam Rifles, NEEPCo, NHIDCL, NEDFi, NERCORMS, NERAMAC, NEHHDCL, NESAC bad NIC kin sa ïashim bynta lang ha kane ka jingïalang.
U Amit Shah un sa pyllait paidbah ïa ka NEC Year Book.
Shi sngi shwa ban pynlong ïa kane ka jingïalang, kan sa don ka jingïakynduh ba kyrpang bad ki Chief Secretary jong ki jylla ka thaiñ Shatei Lammihngi, ki Secretary jong ki Ministry ka Sorkar India, ki nongmihkhmat na ka NITI Aayog, u Director General (Assam Rifles) bad ki Planning Secretary jong ka NER.
