Shillong, Nailur 29: Ka Mawryngkneng SC ka la lah ban pynliem noh ïa ka Mawpat SC da 2-0 kol ha ka semifinal jong ka phutbol kyrda’;n Third Division 2024 ba la pynïaid da ka Shillong Sports Association ha SSA Ground, Polo.
Katba ka Umpling SC ka la pynliem ïa ka Tynring SC ha ka semi final kaba bud. Kumta kine baroh ar kynhun kin sa ïakynduh ha ka final ban ïaknieh ïa ka namlahduh ha ka 2 tarik u Risaw.
Haba phai sha ka semi final kaba nyngkong, hapdeng ka Mawryngkneng SC bad ka Mawpat SC, ka kylla step ka la kut khlem don mano mano ba lah ban pynkhihjar. Dei hadien 15 minit ba la jam ka kylla miet ba u Sanlangki Marboh (50 min) u la ïoh ban buh hakhmat ïa ka Mawryngkneng lyngba ka kol kaba itynnat na ka free-kick kaba u la shut.
Lah ban ong ba kane ka jingïalehkai kam shym la paw ban sakhi bun ki kol naba ka Mawryngkneng ka la pyrshang katba lah ban pyntyllun bad ban pynsep ei ïa ka por hadien ba ïoh lamkhmat, hynrei ynda ka la ïoh biang ïa ka kabu ka la pynkhih sa ïa ka kol kaba ar ha ka 78 minit lyngba u Banker Mynsong.
Haba phai pat sha ka semi final kaba ar, la sakhi ïa ka Umpling SC kaba la pynliem noh da 2-1 kol ïa ka Tynring SC ban ïohrung sha ka final.
Ha ka jingïakhun dei ka Tynring kaba la lamkhmat nyngkong na ka kol u Tyngshaiñbor Ryntong (26 min), hynrei ka Umpling ka la jubab da kaba pynïakhaid lyngba u Tonas Nongbri (31min).
Haduh kaba kut jong ka por ym shym la don satia ba lah ban pynïakhlad ïa kine ki ar kynhun kaba la pynlong ïa ki ban jam sha ka extra time. Khadduh ynda la jam sha ka minit ba 100 ba u Bebankitdor Nongkynrih u la pynkhih ïa ka kol kaba ar na bynta ka Umpling ban khur ïa ka jingjop.
Lah ban kdew ba kine ki ar kynhun ban aireng na bynta ka namlahduh, kim pat shym la mad nam rem ha ki wat ïakhun Group Stage, ka Mawryngkneng ha ka Group A bad ka Mawpat ha ka Group B. Kumta ka jingïakhun final kan long kaba itynnat hapdeng kine ka ban long ha ka 2 tarik u Risaw ha SSA Ground, Polo.
