Shillong, Nailur 29: Ka Meghalaya ryngkat bad san tylli kiwei pat ki jylla hapoh ka lama jong ka North East Cricket Development Council (NECDC) kin ïakhun ban long lahduh jong ka thaiñ ha kaba kin sa ïaknieh ïa ka khusnam jong ka 1st Senior Women’s Interstate Friendship T20 Tournament, kaba la khreh ban sdang naduh mynta ka sngi.
Kane ka lympung ïalehkai ba la pynlong da ka Meghalaya Cricket Association kan kut noh ha ka 4 tarik u Risaw bad baroh ki jingïalehkai kin long ha Pahamsning Cricket Ground, Nongkhrah, Ri-Bhoi. Yn pyni Live lyngba ka cricheroes app.
Kane ka lympung ka long ruh kum ka jingpynkhreh kaba kongsan na ka bynta ka Senior Women’s T20 Trophy jong ka BCCI, kaba sdang ïa ki lympung jong ki kynthei hapoh ka ri na ka bynta u snem 2024-25 ha u bnai ban wan.
Nalor ka Meghalaya, ki san tylli kiwei pat ki jylla jong ka NECDC ki long ka Arunachal Pradesh, Manipur, Mizoram, Nagaland bad ka Sikkim. Ka Meghalaya, Arunachal Pradesh bad ka Manipur ki la shah pynïakap hapoh ka Group A, katba ka Nagaland, Mizoram bad ka Sikkim ki la shah thup hapoh ka Group B.
Lah ban kdew ba baroh hynriew tylli ki jylla ki dang pyrshang katba lah ban pynroi ïa ka jingïalehkai kriket hapdeng ki kynthei ha la ki jong ki jong ki jaka bad la sakhi ruh ba kane ka jingïalehkai hapoh kine ki jylla ka la sdang kham kiew.
Ha ka samoi lehkai 2023-24, ka Sentilemla Imsong jong ka Nagaland ka la tied ïa ka half-century kaba nyngkong na bynta ka North East Zone, katba ka Debasmita Dutta jong ka Meghalaya ka la khur ïa san wicket kiba nyngkong na bynta ka North East Zone.
Kumne, kane ka jingïalehkai ka nang kham roi bad ka jingsngewtynnad ïa ka kriket hapdeng ki nongïalehkai ha man la ki distrik ha Meghalaya ka la nang san, ka MCA ka don ka jingkyrmen kaba skhem ban ïoh ïa ka khusnam BCCI na ka kynhun ïalehkai ki kynthei jong ka ha ka lawei kaba ym da jngai than.
Ka Debasmita kan ïalam ïa ka kynhun (Meghalaya) kum ka kapten, katba ka Monica L Phawa kum ka symbud kapten.
Ki jingïalehkai mynta ka sngi kan long hapdeng ka Arunachal Pradesh pyrshah ïa ka Meghalaya naduh ka por 9 baje mynstep, nangta ka jingïakhun kaba ar hapdeng ka Mizoram pyrshah ïa ka Nagaland ha ka por 12 shiteng mynsngi.
