Shillong, Nailur 29: Hadien ba ka lympung SSA Third Division 2024 ka la sah satang shis sien ïakhun (final) ban pyndep bad ruh ka kyrdan Second Division 2024 ka la nangjam shakhmat, ha ka sngi Saitjaiñ ka Shillong Sports Association ka la pyllait ïa ka prokram ïalehkai na bynta ka First Division, ha kaba yn sdang ïa ka naduh ka 5 tarik u Risaw, ha SSA Ground, Polo.
Katkum katei ka prokram, ka SSA ka la ïoh ban pynthikna ïa 20 tylli ki jingïalehkai na bynta ka wat ïakhun ba nyngkong (First Leg) ban sdang naduh u Risaw bad ban kut ha u Naiwieng, ïa kaba yn pynïalehkai ar tylli ki jingïakhun ha ka shi sngi.
Kumba ka paw, mynta u snem ki don 10 tylli ki kynhun ki ban aireng pyrshah kawei ïa kawei ha ka rukom ïakhun League stage. Kumta yn nym don jingïakhun knockout bad ka kano kano ka kynhun kaba wan ha khliehduh jong ka miej kheiñ point ha kaba kut jong ka round robin stage kan ïohrah ïa ka namlahduh.
Lah ban kdew ba ki don saw tylli ki kynhun ba la shah kyntiew kyrdan na ka Second Division 2023, kine ki kynthup ïa ka Pohkseh SCC (lahduh 2nd Division 2023), ka Mawtawar SC (ba wan ba ar), nangta ar tylli ki kynhun ba mad namrem ha ka semi final, ka Nongrah SC bad ka Sohryngkham SC.
Nalor kine saw tylli, ka Nongkseh SCC (kynhun lehkai 2nd Division) kan ïasohlang ban shimbynta ha ka kyrdan First Division hadien ba la thied ïa ka jaka ba thylli ba la lilam da ka SSA, ban long ka kynhun kaba 10 ha kane ka kyrdan ïalehkai.
Kumban shu pynkynmaw, ka SSA ka la pynsangeh shipor ïa ka jingsloit kyrdan ïa ki kynhun na bynta u snem 2023, kumta ym shym la don ki klob ba hiar kyrdan na ka SPL bad ym shym la don ruh ki kynhun na ka 1st Division kiba shah pynhiar kyrdan Second Division.
Ka jingïalehkai kaba nyngkong ha ka SSA First Division (5 tarik Risaw, 2024) kan long hapdeng ka Pohkseh S&CC pyrshah ïa ka Mawtawar SC ha ka por 12 baje mynsngi, nangta bud sa ka jingïakhun hapdeng ka Nongrah SC pyrshah ïa ka Sohryngkham SC ha ka por 2:45 nohphaisngi, ha SSA Ground, Polo.
