Meghalaya Youth League: Bat kyrdan nyngkong, ba Ar ka Ri-Bhoi DSA bad ka Shillong SA ha ka Zone C

Shillong, Nailur 29: Hadien ba la pynkut ïa ka wat ïakhun round robin (Group Stage) jong ka Meghalaya Youth League 2024 na ka Zone C, la sakhi ba ka Ri-Bhoi District Sports Association bad ka Shillong Sports Association ki la ïai bat skhem ïa ka kyrdan ba nyngkong bad ba ar (mar-ïabud).
Kane ka lympung ïalehkai ba thymmai kaba pynleit jingmut ban kyntiew ïa ka sap ïalehkai phutbol ki khynnah samla, ba la pynlong da ka Meghalaya Football Association ha ryngkat ka jingkyrshan na ka tnat Sports jong ka Sorkar Jylla, la sakhi palat 500 tylli ki kol na ki 144 tylli ki jingïalehkai ba la kyllumlang ïa ki jingïalehkai ha ka U-14 bad ha ka U-16 lyngba ki jingïalehkai kiba ki khynnah samla ki la pyni ïa ka jingtbit bad ka sap kaba phylla naduh kiba dang rit tam.
Hadien ba la pyndep baroh ki jingïalehkai round robin, la lah ban pynthikna ïa baroh ki kynhun ki ban ïakhun ha ka Quarter final, ha kaba baroh phra tylli ki kynhun kin wan ryngkatlang ha Shillong naduh ka 5 tarik Risaw katba ki dang jam shakhmat ban ïohrah ïa ka khusnam bad khamtam ïa ka burom ban long lahduh.
Baroh lai tylli pat ki zone ki la pyndep ïa ki jingïalehkai jong ki hynrei ki don ar tylli pat ki jingïalehkai ha baroh ar tylli ki kyrdan (U-14 bad 16) na ka Zone C kiba la shah pynkynriah bad donkam ban pyndep ïa ki. Lah ban kdew ba kine ki jingïalehkai ki long kiba kongsan bha namar kin rai kano ka kynhun ka ban shim ïa ka kyrdan ba nyngkong hapoh ka Zone. Ka RBDCA ka dang lamkhmat ïa ka SSA shuwa ki jingïalehkai hynnin ka Sngi Saitjaiñ bad ki la lah ban ïai bat ïa ka kyrdan jong ki da kaba jop ha baroh ki kyrdan ha katei ka sngi.
Ha ka thup ïalehkai ki khynnah U-14, ka Ri-Bhoi ka la pynliem kput ïa ka Riwar Mihngi Football Association haduh 11-0 kol ha Umdihar Mini Stadium, ha kaba u Ribanshan Kyrsian bad u Meland Mawiong ki la ïoh ban thep mar lai kol. Na bynta ka SSA, ha madan MFA Turf, la sakhi ïa u Adriel Branyden W Nongbet u ba la khyrwit hat-trick kaba la ïarap ïa ka kynhun ban pynliem ïa ka Sohra Sports Association da 8-0 kol.
Ka kynhun ïalehkai Under-16 jong ka Ri-Bhoi ka la jop da 7-0 kol ïa ka Riwar Mihngi, katba ka Shillong ka la pynliem ïa ka Sohra haduh 12-1 kol, ha kaba u Baniar Kharsahnoh u la thep 4 kol nangta u Iaisanlang Dohling u la ïoh thep lai kol. Watla ka la shah thep bun kol, kai khynnah lehkai jong ka Sohra ki la ïoh ban pynphai shi kol lyngba u Sanmehaki Shangpliang. Ka Sohra ka la pyni ïa ka jingkut jingmut bad ka mynsiem ïakhun kaba shongkun hynrei ka dang donkam ban kham pyntbit bad ban don ka jingshañiah halade haba poi ha ki khep ban pynkhihjar namar bunsien ki player artatien noh ynda ki la ïoh ïa ki kabu hajan kol, kane ka dei kaei kaei kaba ki lah ban pynbha shuh ïa ka kynhun na bynta ka Meghalaya Youth ka ban sa long biang ha u snem ban wan.
Da ka jingkut jong ka Round Robin la ïoh pynthikna baroh 8 tylli ki kynhun ban ïakhun ha ka quarterfinal, na ka Zone A ki long ka Tura District Football Association bad ka North Garo Hills District Sports Association ha ka U-14, katba ka Williamnagar District Sports Association bad ka North Garo Hills ha ka U-16.
Kiwei pat ki kynhun ki long ka West Jaintia Hills District Sports Association bad ka Amlarem Block Sports Association (U-14 bad ruh ha ka U-16) na ka Zone B, ka Ri-Bhoi bad ka Shillong (U-14 bad ruh ha ka U-16) na ka Zone C, nangta ka Nongstoin District Sports Association bad ka Pyndengumiong District Sports Association (U-14 bad ruh ha ka U-16) from Zone D.
Ha kaba ïadei bad ka prokram ïalehkai jong ka Quarter final la pyntip ba ka MFA kan sa pynbna shen.