Delhi, Rymphang 03 : U Myntri Rangbah Duh ka Ri, Narendra Modi ha ka 4 tarik u Rymphang ha kumba 11:30 baje mynstep, u Myntri Rangbah Duh un plie paidbah bad buh maw nongrim ïa ki sienjam bapher bapher na ka bynta ka roi ka par kiba palat 11,000 klur tyngka ha ka jingïalang paidbah ha nongbah Guwahati.
U Myntri Rangbah Duh un plie paidbah bad buh maw nongrim ïa ki projek kiba kot sha ka T. 11,000 klur ha Guwahati.
Ha ka jingleit sha Assam, u Myntri Rangbahduh un buh maw nongrim kynthup ia ka Maa Kamakhya Divya Pariyojana (MaaKamakhya Access Corridor), ia kaba la mang hapoh ka skhim Prime Minister’s Development Initiative for North Eastern Region (PM-DevINE). Kan pynbiang ïa ki jingdonkam katkum ka juk mynta ia kito kiba leit pilkrim sha ka Kamakhya temple.
U Myntri Rangbah Duh un buh maw nongrim ïa ki projek pynbha ïa ki surok kiba palat 3400 klur tyngka ban pynbha shuh shuh ïa 43 tylli ki surok ba kynthup 38 tylli ki jingkieng kum shi bynta ka South Asia Subregional Economic Cooperation (SASEC) Corridor Connectivity. Nalor kine, un plie paidbah ïa ar tylli ki projek 4-lane kiba long ka surok Dolabarisha Jamuguri bad Biswanath Chariali sha Gohpur.
Kine ki projek kin kyntiew ïa ki lad ka leit ka wan sha Itanagar bad kyntiew ïa ka ïoh ka kot ha kane ka thain.
Khnang ban plie lad ïa ki kam ïalehkai ha ka thain, u Myntri Rangbah Duh un buh maw nongrim ïa ki projek ban kyntiew ïa ki jingdon jingem jong ka jylla ha ki kam ïalehkai. Kine ki projek ki kynthup ïa ka sports stadium ha Chandrapur, bad ka jingkyntiew ia ka Nehru stadium kum ka FIFA standard football stadium.
U Myntri Rangbah Duh un buh maw nongrim ruh ia ka jingkyntiew ïa ki jingdon jingem jong ka Gauhati Medical College and Hospital. Shuh shuh, un buh maw nongrim ïa ka medical college ha Karimganj.
