Shillong, Nailur 10 : U Myntri ka tnad Pule Puthi ka sorkar jylla, u Rakkam A Sangma u la pyntip ba shen un sa buddien ïa ka jingpyntrei ïa ki 40 tylli ki Edklavya Model Residential School ha kylleng ki bynta jong ka jylla.
Katkum ka jingïathuh jong u ha ki lad pathai khubor, ka jingpyntrei ïa kitei ki skul ka la ïaid mynta shakhmat.
“Shen ngin sa shong ïa ka jingïalang buddien halor kane ka mat,” u la ong.
Lah ban kdew hangne ba ïa kitei ki Residential School la mang da ka sorkar pdeng ha ka jinglut kaba 24klur tyngka kawei ha ka samoi treikam jong u snem 2018 – 19.
Da kaba kam ba ka jylla ka dang sah shadien u Myntri u al ong ruh ba ha ka jingshisha kitei ki skul ki la dei ban pyndep ha ki 3 bad saw snem mynshwa hynrei haduh mynta kiba dep ki dang don tang ar tylli. “Kumta ngi dang pyrshang ban ïoh pyndep noh kham kloi ïa ki baroh,” u bynrap biang da kaba pyntip ba ïa ka kam la ai ha ka kompeni na Manipur.
“Kum ka sorkar ngim da donbor shuh namar mynta ka la don ha ka kti jong ki kontaktor watla katta ngi dang buddien ban phah pynstet ïa ka kam,” u la ong.
La ïoh jingtip ruh ba ka jingpynslem ban tei ïa kitei ki skul kadei ruh namar ka jingshem jingeh ban ïoh ïa ka jaka.
Kito ki jaka ba ïoh ïa kitei ki skul ki hap ban ai 15 hectare ka jaka khlem siewdor namar kadei ka polisi ba la buh da ka sorkar India.
