Shillong, Nailur 10 : Ka Meghalaya College Teachers’ Association (MCTA) ka la rai ban pdiang ïa ka jingkhot ïa kren jong u Vice Chancellor jong ka North Eastern Hill University (NEHU) ban ïa kren halor ka jingpyntreikam ïa ka National Education Policy (NEP) 2020.
Ha ka kyrwoh khubor, u General Secretary ka MCTA, u Bah AW Rani u la ong ba ka Association ka la ïoh pdiang ïa katei ka jingkhot jong u VC ha ka 08tarik mynta u bnai ba kan don ka jingïakren halor ki ishu ba ïadei bad ka NEP 2020.
Shuh shuh u la ong ruh ba ka MCTA kaba thrang ban trei na bynta ka bha ka miat jong ka pule puthi ka khmih lynti ba ka jingïakren kan long kaba seisoh bad kumta ka la pdiang ïa katei ka jingkhot ïakren kaban long ha kane ka sngi Nyngkong.
Nalorkata, u la ïathuh ruh ba ka Association ka khmih lynti ba u Vice Chancellor un peit bad pynsngew ïa ki mat kiba ka Association ka rah naduh ka 21tarik Naitung.
Ka la ong ruh ba na ka liang ka MCTA ki la dawa na u VC ka NEHU ba u dei ban weng noh shwa ïa ka jingpynbna kaba 12tarik Naitung ban pynkut noh ïa ka jingkynad kaba la neh slem halor ka jingpyntreikam ïa ka NEP.
Utei u nongïalam ka MCTA u la ïathuh ruh ba ki nonghikai jong ki 22tylli ki college hapoh ka lama jong ka MCTA ki la sangeh shim class ïa ki first semester hapoh ka NEP bad kim shym la shim ruh ïa kano kano ka kam (assignment) kum ka jingpynkhreh ïa ki jingkylli na bynta ki lynnong jong ka first semester hapoh katei ka education policy ba thymmai. Hynrei la ong pat ba kin bteng ban hikai ïa ki khynnah jong ka 3rd haduh 5th semester ha katei ka course ba mynta.
