Rah ka samla Stella ïa ka nam Miss Meghalaya, ka Angelina ïa ka Miss Teen Meghalaya

Shillong, Nailur 09 : Ka samla Stella Khongsngi ka la ïoh phong ïa ka pansngiat Miss Meghalaya 2023 katba ka samla Angelina Jackson ka la ïoh phgong ïa ka pansngiat Miss Teen Meghalaya 2023, ha ka jingïakob kaba la long ha ka miet Sngi Saitjain ha U Soso Tham Auditorium.
19 ngut ki thei samla na kylleng ki bynta jong ka Jylla, ki la wan iashim bynta ha kane ka jingïakob thei ba bhabriew tam.
Ka samla Stella ka la ïoh ban rah ïa ka nam ym tang namar ba ka bhabriew bad wandur ka met ka phad hynrei ka dei ruh ka jingproh jabieng jongka. Kane ka samla ka dang pule ïa ka Bachelor of Science (B.Sc) ha ka Mathematics ha St. Mary’s College, Shillong bad nalor ka nam Miss Meghalaya 2023, ka la ïoh rah ruh ïa ka nam Miss Personality bad Miss Catwalk.
Kumjuh ruh ka Samla Angelina Jackson ba dang 18 snem ka rta, ka la ïoh phong ïa ka pansngiat Miss Teen Meghalaya 2023. Kane ka samla ka dang pule ha St Mary’s Higher Secondary School, Shillong.
Ka samla Stella ka la ïoh rah ruh ïa ka song khusnam ba T. 1 lak, ka samla Lamiker Dkhar kaba wan ba ar ha ka Miss Meghalaya 2023 ka la ïoh rah ïa ka khusnam ba 50 hajar tyngka bad ka samla Sanijaijai Khyriem kaba wan ba lai ka la ïoh ïa ka khusnam ba 25 hajar tyngka. Ka Angelina (Miss Teen) ka la ïoh rah sha ïing ïa ka cheque kaba T. 25,000.
Kiwei pat ki samla kiba la ïoh ia ki khusnam subtitle ha ka Miss Teen Meghalaya 2023 ki kynthup ïa ka Genelia Dkhar kaba ïoh ïa ka Miss Catwalk, Palei M Chyne kum ka Miss Talented, Gracie Nandy kum ka Miss Personality, Denice Kharkongor kum ka Miss Photogenic.
Ha ka thup Miss Meghalaya, ïa ki nam subtitle la ïoh rah da ka samla Stella Khongsngi kum ka Miss Catwalk bad Miss Personality, Ibadonbok Shisha Marwein kum ka Miss Talented, Dipa Ghime kum ka Miss Warrior Princess, Lavakeni Surong kum ka Miss Photogenic, Sanijaijai Khyriem kum ka Miss Fusion Queen, Rida Maia kum ka Eco Queen bad ka Remika Dkhar kumka Miss Congeniality.
Ki Judge kiba bishar ïa kane ka jingïakob ki kynthup ïa ka Ilasara Kharkongor, Charlee Lalthenmawia, Kethileno Kense Vehienuo , Kong S Marwein bad James Owen Farreira.
Ki nongjop ïa ka Miss Meghalaya 2023 bad Miss Teen 2023 kin sa leit mihkhmat ïa ka Jylla sha ki lympung ïakob thei bhabriew ki ban long ha kane ka thaiñ Shatei Lam Mihngi bad sha kylleng ki jylla hapoh ka Ri.