Lum jingtip ka Sorkar ïa ka jingshim bai pule ki Skul bad ki College bapher bapher ha jylla

Shillong, Nailur 10 : Ka sorkar jylla ka la lum jingtip ban ïoh ïa nujor ïa ka jingshim bai skul bad College ki jaka pule bapher bapher ha ka nongbah bad ka jylla kiba la pynïaid da ki riew shimet, ki kynhun niam bad kiwei kiwei.
Ka sorkar ka leh ïa kane hadien ba ka la ïoh ka jingujor na ki kmie ki kpa jongki khynnah skul bad samla pule ba ka jingshim bai skul bad college ki nongpynïaid ka la long shaba palat pud kaba la buh ïa ki kmie ki kpa ha ka jingeh ban phah skul ïa ki khun nalor ba kiba bun ki skul bad ki college ki ïoh ka jingkyrshan na ka sorkar.
“ Ngi dang lum jingtip ban ïoh ïa nujor ïa ki baiskul bad college hapoh ka nongbah bad ka jylla hi “ ong u myntri ka tnad pule puthi u Rakkam A Sangma.
Ym tang ïa ki skul hynrei ka sorkar ka la ïarap ruh ïa kiba bun ki college hapoh ka jylla bad kiba bun ki dei ki Government Aided College.
U la ïathuh tang hapoh kine ki arsnem ka sorkar ka lamang haduh 509 tylli ki post na ka bynta ki 20 tylli ki College kata ïa ki ban hikai bad ki ban don ha ki ophis bad kiwei kiwei ki jingdonkam jong ki college.Kane hi ka pynpaw ba kane ka sorkar hapoh ka jingïalam u Myntri Rangbah u Conrad K Sangma ka dei kaba shim khia ban kyntiew ïa ka pule puthi ha ka jylla.
Shwa ïa kane ka sorkar ka la ïarap ruh ïa ki 13 tylli ki college.
Haba la kylli hato ka sorkar kan buh dor noh mar katjuh ka baiskul ïa baroh ki skul bad college, u Myntri u la ïathuh “ Mynta ngi dang lum jingtip ban ïa nujor bad hadien kata ngin sa shim rai. Ha nga hi marwei nga kyrpad ïa ki bor pynïaid ki skul bad ki college ba kin pyrkhat lem ka baiskul namar ka sorkar ruh ka ïarap ïa ki. Kan long ka jingmyntoi kaba khraw ïa ki khynnah skul, ki samla pule bad khamtam ïa ki kmie ki kpa lada ki bor pynïaid kin kham pynduna ïa ka baiskul”.
U la ïathuh ym tang ki kmie ki kpa hynrei kiba bun ki seng ki la wan ïakynduh ïa ka sorkar bad kyrpad ba kan peit bad bishar halor kane ka jingrem dor palat ka bai skul bad bai college.
Ka sorkar ka la dep thung 100 ngut ki nonghikai ha ka St Mary’s College, Shillong, 18 ngut ha ka PGT, 30 ngut ha ka Don Bosco College, Tura, 18 ngut ha Seng Khasi College, Shillong, 55 ngut ha UCC College, 119 ngut ha ka St Anthony’s College, Shillong, 15 ngut ha ka Shillong Commerce College, 34 ngut ha ka Mendipathar College, 72 ngut ha ka Sanardev College, 71 ngut ha ka Synod College, 85 ngut ha ka Lady Keane College bad 82 ngut ha ka St Edmund College.
Ha ki Adhock Pattern, Women College 22 ngut, Raid Laban College 34 ngut, Tikrikilla College 12 ngut bad mynta ba ka dei ka Peoples’ College la thung 32 ngut bad Durama College 23 ngut.