Yn bei pisa ka sorkar ban pynbun ki FPU, shen yn tei ïa ka Organic Spice Industrial Unit ha Bhoirymbong
Nongpoh, Nailar 10: U Myntri Rangbah ka jylla u Conrad K Sangma mynta ka sngi u la leit ban buh mawnongrim naka bynta ban tei ïaka Organic Spice Industrial Unit (Prime Hub) jong ka Eastern Ri Bhoi Organic Farmer Producer Company Ltd ha Bhoirymbong da ka jingangnud ban kyntiew ïaki nongrep bad ki mar rep kum u sying, shynrai bad kiwei kiwei.
Ïa katei ka Organic Spice Industrial Unit la bei pisa da ka sorkar haka jinglut kumba 16 klur ka ban sa pynïaid da ka kynhun Eastern Ri Bhoi Organic Farmer Producer Company Ltd na Bhoirymbong.
Ha katei ka sngi la wan ruh ban sakhi da u Bah Damanbait Lamare MLA ka Umroi, u A Baranwal Deputy Commissioner ka Ri-Bhoi District, ki ophisar naka tnad ka rep ka riang bad kiwei kiwei.
Haba kren ha katei ka sngi naka liang u Conrad K Sangma u la ong ba ka sorkar ka angnud ban kyntiew bad ïarap ïaki nongrep bad don ruh ka jingthmu ban pynbun ki Food Processing Unit (FPU) haka jylla, namar lyngba kitei ki jaka saiñ ïaki mar rep kan long ka jingkyrkhu pat ban kyntiew ïaka ioh ka kot ki nongrep khamtam ban dang lah ban pynheh dor shuh shuh ïaki mar rep jong ki.
U Myntri Rangbah u la pynpaw ruh ka jingsngewkmen halor ka jingurlong katei ka project ka ban sa tei shen ha Bhoirymbong da kaba ai jingïaroh ïa u MLA ka Umroi u ba don bynta ban pynbor ïaka sorkar jylla ba ka thaiñ Umroi ka dei ban don kawei ka Induatrial Unit.
“Nga kloi ban ïarap ïaki nongrep bad kitbok ruh ba katei ka Industrial Unit kan long ka jingmyntoi bad ka jingkyrkhu ïaki paidbah nongrep ka thaiñ Umroi bad lyngba katei ka jingiarap jong ka sorkar kan nang kyntiew ïaka ioh ka kot ki paidbah” la ong u Conrad Sangma
Shuh shuh u la ong ruh ba ka Umroi ka dei kaba biang bad kaba donkam eh ba bynta ka kam khaii ka pateng ha ka jylla hi baroh kawei, namar ka Airport ruh ka don ha kane ka thaiñ, ka surok ruh ka dei kaba biang, na bynta ban leh ia ki kam khaii pateng bad khlem pep kane ka thaiñ kan long kawei jaki jaka khaii kaba heh naka bynta ka jylla baroh kawei.