Mawkyrwat, Lber 01: Ka ophis jong u District Medical & Health Officer (DM&HO) jong ka South West Khasi Hills District, Mawkyrwat u la ai kane jingpynbna paidbah ba kan don ka jingai dawai polio ïa ki khynnah kiba hapoh 5 snem ha baroh kawei ka South West Khasi Hills District.
Namarkata, na ka liang ka ophis ka la dep ruh ban pynbeit ïa ki tarik kata ban sdang naduh ka 4 tarik haduh 6 tarik u Lber, 2024. “Ha ka tarik ka jingai dawai polio kan dei ha shnong ha thaw ba la dep pynbeit lypa ha ki shnong ki thaw katba ha ka 5 bad 6 tarik ka dei ka jingleit rung ïing ïa ki bym ïoh ban ai ha u 4 tarik”.
Kumta ki bor ba dei peit ia ka tnat ka Koit ka Khiah jong ka South West Khasi Hills District ki la khot bad wer ïa baroh ki kmie ki kpa kiba don ïa ki khunlung bad ki khun kiba dang hapoh 5 snem ka rta ba kin ai ka jingïasnohkti lang bad ka ophis da kaba wanrah ïa ki khun ha ki jaka ba la pynbeit ha ki shnong ki thaw na ka bynta ka jingai dawai Polio.
Ka jingai jong ki paidbah ïa ka kti kamon kti kadiang kan pynlong ïa ka program kaba jop, la ong shuh shuh ki bor ba dei peit ka Koit ka Khiah khnang ban rat dyngkhong ia ka jingpang Polio.
