Shillong, Jymmang 24: Ka jingkhyllem jong ka bynta ba pdeng ba don ka tnum pyllun ne ka Dome ha ka ïingdorbar Thawaiñ ba thymmai, ka la pynsyier bad pynartatien ïa kiba bun balang bad shisha ka long kumta imat.
Ha ka jingleit jngoh ki nongthoh khubor ïa katei ka jingtei ha ka por ba leit jurip u Speaker bad kiwei de ki heh sorkar ha Mawdiangdiang, la lap ïa uwei u païa jong ka kamra kaba don ha ka liang ka diang jong ka ïingdorbar ne ka Left Wing, uba ka rukom khleh ïa ka dewbilat imat ka don ka jingleh torti. Ka daw ka long ba ka dewbilat ha une u païa ka pra phur phur wat haba khñiot wat tang da i shympriah kti ruh. Nangta la lap ruh ba ki don kato katne ki kamra kiba la sdang orpait ka kynroh ne ka bynta kaba shabar jong ka kynroh ne ka astor.
“Kane te ka bym i shngaiñ phi”, la ong uwei na ki dkhot jong ka High Power Committee, haba ki nongthoh khubor ki la pyni ïa ka video ba la ring ïa ka jingpra ka dewbilat jong une u païa.
Lah ban kdew hangne ba ka HPC, kaba la long mynta ka sngi, ka la rai ban aiti ha ka Third Party lynba kawei na ki IIT jong ka ri India ban peit bniah bad tohkit ruh ïa ka rukom shna ïa kiwei de ki bynta jong ka jingtei ïa ka ïingdorbar nalor ka jingtohkit ruh ïa ka jingtwa ka tnum pyllun.
