Ym tang ba shah pynkhyllem ki dieng kwai, ki soh, shah byrngem ruh ki Khasi ba sah ha Cachar

Shillong, Nailur 07: Shi taiew hadien ba ki bor jong ka tnad Forest ka Assam, kila pom bad pynkhyllem ïa ki dieng kwai, ki tympew bad ki diengsoh jong ki paid Khasi Pnar kiba shong ba sah ha ki lai tylli ki Shnong jong ka Cachar Hills District, ki paidbah nongrep jong kine ki Shnong haduh mynta ki dang don sah ha ka umdum bad ka shaïong bad khamtam eh ka jingshongsyier.
Hynnin ka sngi, na ka liang ki nongïalam ka Hills Farmers Union (HFU), hapoh ka jingïalam u Samla Alfond Kharsyntiew, nangta u Bah Shanbor Rymbai, General Secretary ka HFU Jaiñtia Hills bad kiwei kiwei de, ki la leit jurip ïa ka jingwan pynjulor ka Assam ha ki lai tylli ki Shnong ïa ki mar rep jong ki paidbah Khasi Pnar, kiba shong ha Durgacherra, Durbintilla bad Dabinalla.
Ha kine ki Shnong ka HFU ka la lap ïaka jingshah pynkhyllem ki dieng kwai kiba ki nongrep ki la thung bad sumar shitom la bun bun snem. Nangta ki dieng soh, u tympew, ka kait bad kiwei kiwei de ki jingthung.
Ki nongrep na kitei ki Shnong ki la ïathuh ba ym dei tang ka jingshah pynjulor jong ki jingthung, hynrei kaba kham sngewtieng eh ka long ba ki la ïoh ïa ki eviction notice ne ki notis ban phah mih noh ïa ki na kine ki Shnong. Donruh kiba la shah byrngem ba lada kim mih noh na kine ki Shnong ki bor ka tnad Forest ha Assam kin leh da ka bor.
Ki nongrep ha kine ki Shnong ki la ïathuh ba ki la ïathuh ba katkum ka jingthoh jingtar bad ka jingïathuh khana pateng na ki riewtymmen, la ong ba ki Khasi Pnar ki la shong la sah ha kine ki Shnong la palat shispah snem bad don ruh ki la sah la kumba saw pateng. Ka jingleit buhai shnong jong ki hangtei, kadei kaba ki leit rep riang naduh ka por ba dang ia long lang kawei ka District bad kawei ka jylla bad ka Assam.
Na ka liang ki nongïalam ka HFU, haba ki la ïoh lad ban pynlong ka jingïalang ba ki paidbah nongshongshnong ha kine ki Shnong kiba bun kidei hi ki nongrep, ki la ai mynsiem ïa ki ba kin ïalong tylli lang kawei namar kam dei kaba suk ban ïakhun ïa kane ka kam bad ki bor sorkar lane bad ki bor ka aiñ. U Bah Alfond, u la ong ba ka Seng ki nongrep na Meghalaya kin ïatreilang bad ki nongrep na Cachar Hills ban leit buh ka jingkyrpad ha u Myntri Rangbah ka Assam, u Himanta Biswa Sarma bad kumjuh ruh sha u Myntri Korbar ri ka ri India u Amit Shah ban pynsngew ïa ka jingeh ba ki nongshongshnong ha kine ki Shnong ki ïakynduh namar kane ka jingwanbeh jubor ka Assam ïa ki khnang ban pynïaid ïa ki sainar elektrik jong ka Power Grid ha kaba donkam ruh ban pynïeng ïa ki tower ha kine ki Shnong.
U Bah Shanbor, u la ai mynsiem ïa ki ba hapdeng kine ki jingeh ba ki ïakynduh kim dei ban duh jingkyrmen, hynrei ba kin shaniah ha U Blei ba Un ïarap bad ïada lem ïa ki na kane ka jingwan thombor ki bor ka Assam ha ki Shnong ki thaw jong ki.