Resaiñ 2 hajar ngut ki dkhot ka BJP Mawsynram, 13 tarik yn pynïasoh NPP u Bah HM Shangpliang

Shillong, Nailur, 07: Shi sngi hadien ba la mih noh na ka Bharatiya Janata Party (BJP), u MLA barim jong ka Mawsynram u Bah Himalaya Muktan Shangpliang ha ka sngi Palei u la pynbna ba u la shim ïa ka rai ban pynïasoh bad ka National People’s Party (NPP) kaba bat ïa u lakam synshar ha ka jylla ha ka 13 tarik mynta u bnai.
“Nga la pynkhreh ban rung noh sha ka NPP ha ka 13 tarik mynta u bnai ha ka jingïalang ka ban sa long ha State Headquater’s Office jong ka NPP,” ong u Bah Shangpliang uba long mynta u Adviser jong ka tnat Pule Puthi ka Sorkar Jylla, ha ka jingïakren bad ki lad pathai khubor.
Haba kylli, hato u don jingmut neem ban ïakhun ïa ka Elekshon Lok Sabha na Shillong Parliamentary Seat, u Bah Shangpliang u la ong, “nga kwah ban kren da kaba shai ba nga pynïasoh bad ka NPP khlem kino kino ki kyndon. Wei ba nga la pynïasoh bad ka BJP, ngan ïai neh kum u dkhot jong ka party bad lada ka High Command jong ka Party ka ibit ïa nga ban bynshet ïa kano kano ka ngam, nga kloi ban leh ïa kata.”
U la kyntait ruh ban kren eiei halor ka jingkren ba dang shen jong u Symbud Myntri Rangbah u Bah Sniawbhalang Dhar ba u Bah Shangpliang u dei uwei na ki nongpan tiket ban ïakhun na ka Shillong Seat. “Nga ieh ha ka jingrai bastad jong ka High Command ka NPP ban pyndonkam ïa nga ba ngan leh ïa kaba bha tam bad nga long uba kloi ban trei ïa kano kano ka kam ba ka NPP kan bynshet,” u la ong.
U Bah Shangpliang u la ong ba u la shim rai ban pynïasoh bad ka NPP hadien ba u la ïohi kumno u Myntri Rangbah ka Jylla u Conrad Kongkal Sangma u la wanrah shibun ki pynkylla dur bad bun ki kam pynroi ha ka jylla Meghalaya ha ki snem snem ba ladep.
“Namarkata, nga la pyrkhat ba ka NPP ka dei tang ma ka, ka party jong ka jylla kaba lah ban ïarap ïa ki paidbah ha ka jylla ha ka shongsuk shongsaiñ, ha ka roi ka par bad na ka bynta ka lawei kaba bha,” u la bynrap.
Shuh shuh u Bah Shangpliang u la kam ba palat 2,000 ngut ki nongkyrshan jong u na ka Mawsynram BJP Mandal ki la phah ïa ka shithi iehnohkam sha u State President bad kin sa pynïasoh bad ka NPP ha ka 12 tarik mynta u bnai ha Mawsynram.
“Hadien ba nga la resaiñ, nga la ïakynduh ïa ki nongïalam jong nga ha Mawsynram bad nga la pan ïa ka jingmynjur jong ki ban mih noh na ka BJP. Ha ka 13 tarik mynta u bnai, baroh ki nongïalam bahakhmat jong nga, kin sa synran lang ïa nga ha ka sngi ba ngan rung sha ka NPP,” u la ong.
Une u MLA barim ka Mawsynram u la kyntait ïa ka jingkam jong u State President ka BJP u Bah Ernest Mawrie ba u kwah ïa ka kynhun MDA ban sei tang ïa u kyrtong monlang na ka bynta ka elekshon Lok Sabha ka ban sa long.
“Ngam pat ju ïakren eiei ruh em shaphang ka elekshon Lok Sabha bad u Bah Mawrie. Ngam shym la pan tiket hi ruh lymne ngin ïakren shaphang ka jingpynieng ïa u kyrtong monlang lane kano kano ka kam…” u la ong.
“(Ha ka jingshisha) ha kawei ka step, nga kyndit haba nga ïohi ha ka kotkhubor kaba la pynpaw ïa ka kyrteng jong nga kum u kyrtong ban ïakhun ïa ka elekshon Lok Sabha na ka BJP. Mar mar nga la telephone ïa u Dipayan Chakravarty, uba dei u Vice President jong ka State BJP bad nga la ong, kumno khlem ka jingtip jong nga, ka kyrteng jong nga ka mih ha ka kotkhubor shaphang ban pynieng ïa nga kum u kyrtong MP bad ka jubab kaba nga ïoh ka long ba ngim don ïa u kyrtong uba biang ne da uwei pat u briew lait noh tang ma phi, dei na kata ka daw ba ngi jied ïa ka kyrteng jong phi. Lada ki ïakren paramaki, ngam don eiei ban ong shaphang kata,” u la ong.
Ha kajuh ka por, u Bah Shangpliang u la ong ba kam don kano kano ka jingdkoh ha ka BJP hynrei ka jingdkoh ka dei tang ha ki nongïalam jong ka State Party namarba ki don ki jingbym ïasngewthuh jingmut bad ka jingleh donbor kaba ktah ïa ka jingkiew jong ka party ha Meghalaya.
“Ngam ïohi ba kan don ka lawei kaba bha ha ka State BJP watla nga kwah ban ïaineh ha ka Party. Hynrei ki dang don ruh sa kiwei pta ki ishu. Ki don ki jingïashrut hapoh ing, ka jingleh shiliang kaba ktah ïa ka jingkiew jong ka party. Lada ngi hap ban trei na ka bynta ka bha ka miat jong ki paidbah kum kine kim dei ban ïoh jaka hapoh ka party. Namarkata, nga la pyrkhat ba kaba bha tam ka long ba ngan shu mih beit na ka party,” u la ong.
U Bah Shangpliang u la takraiñ tyngeh ïa u Bah Mawrie halor ka jingkynnoh leh shiliang ha kaba thung ïa u para jong u kum u President jong ka BJP Mawsynram Mandal bad ong ruh ba u Bah Mawrie u la thung ïa ka kurim lajong kum ka General Secretary jong ka BJP Mahila Morcha bad ieh sharud ïa ki briew kiba dei hok ban shimti ïa kane ka kam kiba ju trei jar jar baroh shikatta snem.
“Nga kwah ruh ban pynshai, ngi la resaiñ na ka TMC bad u para arkmie jong nga u dei u Block President jong ka TMC bad ïa ka jingresaiñ la ai jingtip sha ka BJP bad mar mar u la ïoh bat biang ïa ka kam President namarba u la rung sha ka BJP bad ïa kata la pyntip hi da u Bah Mawrie. Kam dei kaba nga leh hi ma nga. Ka dei kaba la leh hi da u State President ka Party,” u la ong.
Katkum ka jingïathuh jong u, saw ngut ki MLA barim kiba la pynïasoh bad ka BJP, ki la dei ban long ki nongrah ktien jong ka Party ban pyntip sha ka Jylla shaphang ki skhim bapher bapher ba la ai da u Myntri Rangbahduh ka ri.
“Ngi la dei ban long ki nongrah ktien jong ka Party, ngi la dei ban pyntip sha ki paidbah shaphang ki skhim ba u Myntri Rangbahduh ka ri u Narendra Modi u la ai sha ki paidbah. Kane ka dei kaba la phiel. Balei ngi phiel? Ka dei namarba ka seng hi ka la phiel. Ym pat don satia kano kano ka jingshimkhia da ka party ban pyntip ïa ka khubor jong u Myntri Rangbahduh ka ri. Kane ka dei kaba ngi la leh bakla. Hynrei ka party hi kam shym la leh bakla eiei,” la bynrap u Bah Shangpliang.
U Bah Shangpliang u la ïathuh ba u la pyrshang ruh ban ïakynduh ïa ki nongïalam ka BJP kynthup ïa u Myntri Rangbah ka Jylla Assam u Himanta Biswa Sarma.
“Hadien ba la kut ka elekshon, nga la pyrshang ban ïakynduh bad u Myntri Rangbah ka Jylla Assam u Himanta Biswa Sarma. Nga la pyrshang lai sien hynrei khlem seisoh eiei ruh em. Nga la pyrshang ban ïakynduh ïa u Rituraj Sinha. Hynrei manl ka por um ju shim hi ruh lada nga telephone bad nga la phah kyrwoh sha bad u shu ong ba un sa telephone hynrei ngam ju ïoh satia. Kine ki dei kiba pynbitar ïa nga.”
“Nga la ïakynduh ïa u Bah Sanbor Shullai bad nga la pyntip shaphang kane bad u la bitar lep ïa ka jingjia bad um shym la kren bun ktien hynrei u ong ba dei na kine ki daw kiba pynlong ïa ka party jong ngi ban hiar arsut. Hadien kane, nga la ïakynduh ïa u Bah AL Hek la bun bun sien. Dang ar sngi mynshwa nga la aiti ïa ka shithi resaiñ ha u Bah Hek bad nga la pyntip ba ngan mih noh na ka party. U la kylli na nga ïa ka daw. Nga la pyntip ïa u ïa ki daw bad u la ong sngewsih ïa kaei kaba ladep jia,” u la ong.