Shillong, Nailar 17 : U Chairman ka Regional Committee jong ka West Jaintia Hills ba dei ruh u Symbud Myntri Rangbah ka Jylla, Bah Sniawbhalang Dhar u la ong ba um kwah eh ban pynsngew ne patiaw ïa ka jingkren jong uwei na ki nongïalam ka Karbi Student’s Association ha ka sngi Balang ha Khanduli ha ka por ba ki Myntri Sorkar na Assam bad na Meghalaya ki hiar ban jurip ïa katei ka jaka khappud kum shi bynta ban ïa kren pynbeit pud.
“Ki briew ki don la ka jong ka jingmut bad u A, u B lane u C ki lah ban kren kumno kumno ruh namar kadon ka jinglaitluid ban kren hynrei lada tuklar noh ïa ka, ka lah ban wanrah pynban ïa ka jingbymsngewtynnad,” u la ong haba kren bad ki lad pathai khubor ha kane ka sngi Palei.
Lah ban kdew hangne ba u Bah Sniawbhalang ryngkat bad u Myntri ka Assam ba dei ruh u Chairman ka Regional Committee jong ka West Karbi Anglong District, u Piyush Hazarika hynin ka sngi ki la leit ban jurip sha ka thain Khanduli kum shi bynta ban pynbeit ïa u pud u sam hapdeng ka Meghalaya bad ka Assam. Hynrei ha kane ka sngi utei u nongïalam ka KSA u la pynpaw ba ka lah ban wanrah ka jingjia kaban syriem kumba jia ha Manipur lada ki jaka jong ki, kin leit sha Meghalaya.
Kumta halor kane, na ka liang u Symbud Myntri Rangbah u la ong ruh ba da lei lei kum ki nongïalam kin ym pynsngew ïa ka jingkren jong ki namar ki don ka bynta kaba kongsan tam kata, ban rai ïa kaba tam na ka bynta ki paidbah. “Ngi leit sha katei ka jaka ban sngap ïa ka sur jong u paidbah namar ngi don ban sngap ïa ka sur jong ki,” u la ong da kaba bynrap ruh ba katei ka jingleit jong ki sha katei ka thain ka long ruh ban wanrah ka jingshngain ïa ki paidbah nongshong shnong ba don ha khappud.
U Bah Sniawbhalang u la pyntip ruh ba shen na ka liang ka Committee kan sa aiti noh ïa ka kaiphod sha ka sorkar jylla.
