Shillong, Nailar, 17: Sa uwei u nongïalam jong ka seng kieng atiar ‘National Liberation Council of Nongkyndong ba dang shu pynkha thymmai, u la shah kem ha ki Pulit na Iewduh ha ka step sngi Palei. Une uba la shah kem u la kam ïalade ba u dei u Self-Styled Area Commander jong ka East Khasi Hills District, la ong ki Pulit.
Ka jingïohkem jong ki Pulit ïa ki dkhot ka NLCN ka la kiew sha ka 11 ngut ba kynthup ruh ïa uwei u khynnah skul uba dang 16 snem ka rta uba dang pule ha ka Class-X, la ïathuh ki Pulit.
U Heh Pulit u la ïathuh ba ki Pulit ki la pynlong ka jingthwet kaba jur ban ïoh kem lut ïa baroh ki dkhot jong kane ka seng kieng atiar ba thymmai kiba don sha kylleng ka jylla ïa kiba la pynrung dkhot lyngba ka Social Media.
Ïa kine kiba la shah kem, ki Pulit ki la tian bishar ha ka Kashari ha kane kajuh ka sngi bad ki Pulit ki la pan bor ruh na ka Kashari ban set ha along ki Pulit khnang ba kin ïoh pynlong shuh shuh ïa ki jingtohkit kiba kham bniah.
Kum ban shu pynkynmaw hangne, hynñiew ngut ki nongïalam jong ka NLCN kynthup ruh ïa uwei u khynnah uba dang 16 snem ka rta, ba la pynkha da ki samla na rilum Khasi bad Jaiñtia da ka jingthmu ban hiar thma ïa ka Sorkar bad ban leh ïa ki kam pyntriem ha kane ka jylla Meghalaya ki la shah kem ha ki Pulit jong ka Jylla ha ka sngi Balang.
Kine kiba la shah kem ki kynthup ïa u Self Styled Chairman, u Commander in Chief, u General Secretary bad ki Area Commander jong ka West Khasi Hills, ka Jaiñtia Hills, ïa ki nongpynrung dkhot , ïa u nongbuh jingtip jong kane ka kynhun bad sa lai ngut kiwei pat ki dkhot jong kane kynhun.
U Deputy Inspector General of Police (Eastern Range), Meghalaya, Shillong u Davis Nestel R. Marak, u la ïathuh ba ki Pulit jong ka Jylla Meghalaya ki la ïoh ïa ka jingtip kaba bniah na ki tnat syntiat halor ka jingmih pyrthei jong kane ka kynhun kieng atiar kaba la sdang ban thied ïa ki tiar siat, ban dawa pisa jubor, ban pynrung dkhot bad ban leh ïa ki kam pyntriem.
U la ïathuh ba ka tnat syntiat ka la ïoh ïa ka jingtip kaba thikna ba kane ka kynhun kieng atiar ba thymmai ka la ïatreilang bad kiwei pat ki kynhun kieng atiar na ka jylla Nagaland bad la thmu ruh ban phah pyntbit ïa ka kynhun ba nyngkong eh sha ka Jylla Nagaland ha ka 17 tarik, Nailar, 2023.
Ka tyllong khubor na ki Pulit ka ïathuh ba ka NLCN ka ladep pynrung dkhot haduh 1000 ngut. Ïa ka jingpynrung dkhot la leh lyngba ka Social Media.
Ïa ka NLCN la pynkha ha u snem 2022 hynrei kane ka kynhun ka la sdang ban pynrung dkhot mynta ha ki ar bnai ba la leitnoh. Ka jingthmu jong kane ka kynhun ka long ban pynkhlaiñ shuh shuh ban ïa ka HNLC kaba la shah kheiñ be-aiñ.
Uwei na ki nongïalam ka NLCN u la thep ruh ïa ka dur ha Facebook dang shen kaba u la shon bad ka suloi AK-47 Rifle.
Lyngba kane ka jingïoh jingtip, ka tnat Pulit ka la pynlong ïa ka jingkhynra kaba jur ha ka step jong ka 16 tarik u Nailar, 2023 bad hynñiew ngut ki dkhot ki la ngat ha ka kti jong ki Pulit na ki bynta bapher bapher jong ka Eastern Range ba kynthup ruh ïa uwei u khynnah uba dang hapoh 18 snem ka rta uba la shah kem na East Khasi Hills District.
Halor kane, ki Pulit ki la rejistar da ka Criminal Case ha Crime Branch Police Station, Eastern Range, Shillong hapoh ki kyndon bapher bapher jong ka Indian Penal Code bad hapoh ka Unlawful Activities (Prevention) Act.
Haduh mynta ki Pulit ki dang pynlong ka jingthwet kaba jur ban ïohkem ïa ki dkhot jong kane ka kynhun bad ka jingtohkit halor kane ka jingmih pyrthei kane ka kynhun kieng atiar ka dang ïaid shakhmat.
