Ban pynkynriah uwei u nar elektrik hap pan jingbit, ka dawbah ba slem ka Smart City

Shillong, Nailar 17 : U Symbud Myntri Rangbah ka Jylla, Bah Sniawbhalang Dhar u la kubur ba ka don ka jingslem ha ka jingpyntreikam ïa ki projek jong ka Smart City na kiba bun ki daw kiba ka tnad ka kynduh ha ka jingtreikam.
Haba kren bad ki lad pathai khubor, u Symbud Myntri Rangbah u la ïathuh ruh ba lada phai shwa tang ha ka jingpyntreikam ïa ki surok ba hap ha ka Smart City (smart city road) ka jingtreikam ka suki bha namar ka ïatyngkhuh bad bun ki tnad sorkar.
“Ka don ka jingïatyngkhuh naduh ka tnad ka Koit ka Khiah, MeECL, PHE bad kiwei kiwei. Wat tang ban pynkynriah ïa uwei u nar elektrik ruh la hap ban jingbit,”u la bynrap shuh shuh.
Tangba, u ong pat ba mynta, ki don haduh 18 tylli ki projek kiba dang ïaid shakhmat ha ka nongbah da kaba kdew ba kine ki kynthup naduh ka Iew ha Laitumkhah bad ruh ka Iew ha Polo kaba la jan dep bad la kumno kumno ha u Lber jong u snem ban wan ki la lah ban plie bad pyndonkam noh.
Na ka liang u Symbud Myntri Rangbah u la pyntip ruh ba ka jingpyntreikam ïa katei ka projek ka long mar shiteng bad ka sorkar pdeng kumta na ka projek kaba 1000 klur, ka jylla kan hap ban pynlut mar shiteng.
Shwa kane, u la ong ruh ba ka jingslem jong kitei ki projek ban pyntreikam kam dei satia na u kontraktor hynrei kadei eh eh kumba la kdew haneng naka jingtyngkhuh bad ki tnad sorkar. “Teng teng haba khot jingïalang kawei ka tnad ka lait kawei pat kam lait kumta kane kadei kawei pat ka dawbah,” u la ong.
La pyntip ruh ba shen un sa leit ban jurip ïa ki projek bapher bapher kynthup naduh kitei ki projek ba dei bad ki iew, ki jaka pynieng kali bad kiwei kiwei.