Nongstoiñ, Nailar, 17: Ka Committee on Women Empowerment and Children Protection Cell jong ka Ingdorbar Thawaiñ ka Jylla ba la khlieh da ka Kong Santa Mary Shylla kum ka Chairperson ha ka sngi Palei ki la hiar sha Nongstoiñ ban pynlong ka jingïakynduh lang bad ki bor pynïaid district, ki heh Pulit bad ki ophisar jong ka District Social Welfare, ka District Child Protection, ki Doctor bad kiwei kiwei.
Ha kane ka sngi, la synran lang da ki dkhot jong ka Committee, ba kynthup ïa ki MLA ka Miami D Shira, Bah Adelbert Nongrum, Bah Gabriel Wahlang, Marthone Marak, u Deputy Commissoner ka West Khasi Hills u Bah Garod L.S.N. Dykes, u nongsaidaiñ ka Sorkar ha District Court jong ka West Khasi Hills u Bah Kenny Wahlang bad kiwei kiwei.
Ka mat ba hakhmat jong kane ka Komiti ka long na ka bynta ban ïathir sani halor ka jingsahteng ki mokotduma kiba ïadei bad ki kam leh beijot ïa ki kynthei bad ki khynnah khamtam eh ïa kiba dang hapoh ka rta kaba 18 snem.
Ka Kong Sanata Mary Shylla ha ka jingïakren bad ki lad pathai khubor hadien ba la wai ka jingïalang, ka la ong ba ka jingwan jong ki dkhot ka Committee ha Nongstoiñ, ka dei halor ka nongrim ban pynshai ha ki bor synshar district kum ki heh Pulit bad ki nongsaid aiñ, ba hadien ba la register ïa ki mokotduma ki dei ban pynsted ha ka ban pynbiang ïa ki sakhi satar katkum ka jinglong jingman jong ka mokotduma bad ruh katkum ba la pan da ka Ïingbishar ba donburom. Khamtam eh ïa ki mokotduma kiba la register ha ki kyndon jong ka Protection Of Children from Sexual Offences.
Nalor kata, ka la ong ruh ba ka Committee ka kwah ba ki bor synshar District, ki dei ban shimkhia ban pynlong ïa ki jingai jingpynshai paitbah sha ki nongshong shnong ba kin kiar katba lah na kaba thombor ïa ki kynthei khynnah. Ka la ong ruh ba ki ophisar Sorkar kiba kongsan kum ka tnad Pulit, Social Welfare bad District Child Protection Office ki dei ban shimkhia ban pynshai paitbah halor katei ka mat.
Nalorkata ka la ong ruh ba ki kynhun pahara shnong ryngkat ki longkmie bad nongsynshar shnong ruh, ki don ka hok ban pynshai sha ki paitbah nongshong shnong, ba ki dei ban kiar na kitei ki kam runar. Ki lah ruh ban thaw ki lad kumno ban ïada ïa ki kynthei ki khynnah na ka jingshah thombor ha kino kino ki riew runar bad ki riew shim kabu. Ki longïing longsem ruh ki dei ban shimkhia ha ka ban hikai ïa ki khun ki kti la ki dei ki kynthei ne shynrang ba ki dei ban nang ban kiar na kiba kum kitei ki kam sniew.
