Shillong, ïaïong, 30: Ka People Democratic Front (PDF) haduh mynta kam pat lah ban shim ïa ka rai ban pynïasoh pura bad ka National People’s Party (NPP).
Ïa mynta ka PDF ka don arngut ki MLA, katab u Bah Banteidor Lyngdoh bad u Bah Gavin M Mylliem ha ka Iingdorbar Thawaiñ kaba dang don mynta 59 ngut ki dkhot
Ha ka jingïakren bad ki lad pathai khubor, u working president jong ka Party uba long ruh u MLA jong ka Mawkynrew u Bah Banteidor Lyngdoh u la ong, “ngim pat shim ïa kano kano ka rai la ngin leit pynïasoh neem (bad ka NPP).
“Hynrei, ka jingïakren ka la ïaid shakhmat bad ngi dang ap sa tang ïa ka por kaba biang ban shim rai halor kane ka kam,” u la ong.
Haba kylli, u Bah Lyngdoh u la ong ki nongkyrshan ka Party ki sngewthuh bha ïa ka jingeh bad ‘ym dei ba ngi leit pynïasoh bad ka NPP na ka bynta ki jingmyntoi shimet hynrei ngi pyrkhat ïa ka jingmyntoi jong ka jylla.”
“Dei na kane ka daw ba ka jingïakren ka dang ïaid bad bad ïatreilang ryngkat ryngkat u Myntri Rangbah, u Symbud Myntri Rangbah bad ki nongïalam jong ka NPP ha kine ki san snem baladep bad ma ki ruh ki sngewthuh bha ïa ka jinglong jingman jong ka party namar ban pynïaid ïa ka party kam dei kaba suk bad dei halor kane ki la ong balei phim wan pynïasoh noh bad ngi,” u la ong haba bynrap, “dei halor kane ka daw ba ngi ïakren na ka por sha ka por bad ki nongkitkam jong ka party namarba ngi hap ban shim lang ïa ka jingsngew jong ki.”
Ha u snem 2018, ka PDF ka don 4 ngut MLA ha ka ingdorbar thawaiñ kaba don 60 ngut ki dkhot. Hynrei shwa ka elekshon arngut ki MLA kata, u Bah Hamletson Dohling bad u Bah Jason S Mawlong ki la mih noh na ka party bad pynïasoh bad ka NPP.
Haba kylli halor ka lawei jong ka PDF, u Bah Lyngdoh u la ong, ka long kaba eh ban ïathuh bad kam long hi ruh kaba dei ban kren eiei ha kum kane ka por.
