Shillong, Naiwieng 15 : Ka Khun Hynniewtrep National Awakening Movement (KHNAM) lyngba u working president, Bah Thomas Passah ha ka sngi Balang u la pyntip ba ha kane ka elekshon MP, ka party kan kyrshan ïa ki party katkum ki nongrim kiba ïahap bad ka mat treikam jong ka.
U Bah Thomas u la ong ruh ba ka party ka la dep rai lypa ruh ba kan ym sei kyrtong ha kane ka elekshon MP mynta ka kynti.
“Kane kadei anmar ha ka general council ngi la rai ba nangne shakhmat, kum ka KHNAM ngin pynleit jingmut ha kaban shakri ïaki paidbah lyngba ki district council bad ka kam MP kadei shabar jong ka namar ha kaba khatduh ngin hap ban pynïasoh bad kiwei ki party,” u la ong.
Halor ka jingkylli, u Bah Passah ula ong ruh ba ka party kaba ki rai ban kyrshan kan long beit katkum ka nongrim kaba ïahap bad ka KHNAM.
“Ïano ban kyrshan, ngin sa ïakren haka party tangba ngi la shim pat ïa ka rai ba ngin ym shong ha iing hynrei ngin mih ban shim bynta ha ka elekshon MP,” u ong da kaba bynrap ba ka KHNAM kan ym kyrshan pat ïa ka BJP.
Da kaba ïai ban ba ka party kan kyrshan katkum ki mat, u Bah Thomas u la ong ruh ba ka Inner Line Permit (ILP) naduh 2002 ka la dei ka mat kaba hakhmat eh jong ka KHNAM kumjuh ruh ka Ktien Khasi ban ïoh noh ïa ka jingithuh nalor ka jingkren pynbeit ïa u pud u sam.
