Shillong, Naiwieng, 23: Uwei u rangbah na ka shnong Mawdiengngan, Ri Bhoi district kaba hap hapoh ka Mawhati Constituency u la jah rngai na la iing naduh ka 20 tarik mynta u bnai ha ka por 3 baje noh phai sngi, da kaba shu mih kynsan na la ïing.
Ïa une u rangbah briew la tip kyrteng kum u Sagar Thakuri uba la 37 snem ka rta bad u dei uba la shong kurim bad don saw ngut ki khun.
U hynmen jong une u rangbah uba jah rngai, haba pyntip sha ki lad pathai khubor, u la ïathuh ba u para jong u, u dei uba dang shu ïoh jingpang ha ki bynta ka khlieh bad shu kren kulmar beit marwei marwei bad shu byrngem beit ïa ki briew.
Na ka liang jong ki bahaïing ki la leit ban phah duwai kaba la suba jur ba dei ba ngat lyngkhuh lane ksuid lum ksuid wah bad la ïathuh ruh ba une u rangbah u dei u bym don jingpang u dei u ba shait ba khlaiñ baroh shikatta.
Hadien ka jingjah jong u, ki bahaïing ryngkat bad ka shnong hi baroh kawei ki la pynlong ïa ka jingwad shnong tad haduh mynta bad la pyntip ruh ïa kane ka jingjah sha ki bor Pulit bad na ka liang ki bor Pulit ruh ki la pyrshang ban wad hynrei ym shym la lap dien satia ïa u.
La pyrshang ban telephone ha ka mobile phone ba u ju bat, hynrei, la ïathuh ba ka mobile phone ka jong u ka pah haduh mynta ruh hynrei ym don ba kren. La wad jingtip lyngba ka Location Tracker ruh tangba kam shym la kdew satia ïa ka jaka ba u don.
U hynmen, u Bisnu Thakuri, u la ïathuh ba u para jong u, u Sagar Thakuri, ha ka por ba u la mih na iing u phong ïa ka jacket rong saw thoh ïong bad ka pla saw kaba u kieng ha met jong u bad ka patlun rong blue lam iong bad ka slipar jri ha ka sngi ba u jah.
Kumta kino kino kiba ïohi kin sngewbha ban pyntip sha ki baiing hasem jong u Sagar Thakuri da kaba kin telephone ha u mobile number 9366033824.
