Mawlong, Naiwieng 23: Ka Balang Presbyterian Mawlong, Sohra Presbytery, ka la dap 125 snem ha ka jingïaid lynti jong ka. Kane ka Balang kaba don ha ka Elaka Mawlong ha ka surok na Mawshamok sha Shella, ka la sdang ïa ka jingrakhe ha une u bnai baladep, ha kaba u Senior Executive Secretary ka KJP Synod Sepngi, u Rev ER Kharkrang, u la pynher ïa ka lama Quasquicentennial Jubilee bad u Moderator ka Sohra Presbytery u la pyllait ïa ki 125 tylli ki baloon kum ka dak ka jingplie ïa ka Jubilee.
Hadien ba la plie ïa ka Jubilee, ka Balang ka la pynlong ïa ki Prokram bapher bapher, kiba kynthup ia ki jingïalehkai Sports jong ki Khynnah, ki Samla, ki Longkmie, ki Rangbah bad kumjuh ruh ki Rangbah Balang bad Tymmen Basan.
Ïa ki jingïalehkai Sports Jubilee la pynkut noh mynta ka sngi ha Madan Phutbol jong ka Nongduh Sports Club ha Mawlong, ha kaba u Bah Kyrmen Shylla, Myntri ka sorkar Meghalaya u la long u Kongsan bad u Bah Balajied Synrem, MLA Shella, u la long u Symbud Kongsan.
Ha kane ka sngi ba pynkut la pynlong ïa ka jingïalehkai Phutbol jong ki Khynnah, ki Samla, ki Longkmie, bad kumjuh ruh ka jingïalehkai hapdeng ki Rangbah Balang bad ki Tymmen Basan. Haba kren ha kane ka jingpynkut ïa ka Sports Meet jong ka Balang, u Bah Kyrmen Shylla, u la ong ba ka long kaba sngewtynnad ban ïohi ïa ka jingïatreilang ka Balang naduh ki Khynnah, ki Sama, ki Longkmie haduh ki Rangbah bad ki Nongsharai Balang.
U Bah Kyrmen u la ong ba ka jingtreikam ka Balang ha ka imlang sahlang, ka long kaba donkam haduh katta katta, namar ka Balang ka long kum ka nongtbeh jingshai ha ka pyrthei.
U Bah Balajied ha ka jingkren jong u, u la ong ba ha ka jingtreikam jong u kum u nongmihkhmat paidbah, wat lada ki don ki kyndon aiñ jong ka sorkar, hynrei na ka bynta jong u shem ba ka jinghikai jong ka Bible ka long kaba kham khraw ban ïa ki aiñ jong ka sorkar.
Ha kane ka jingïalang ba la sam ruh ïa ki buskit sha baroh ki nongjop ïa ki jingïalehkai, la ïoh jingkren ruh na u Bah Teiñwell Dkhar, MDC Shella, T.Bn SK Laloo, uba long ruh u Sordar ka Elaka Mawlong, Bah K. Diengdoh, Secretary ka Elaka Mawlong bad kiwei kiwei. Ha kane ka sngi ba la pynlong ruh ïa ka Food Fest la don lang ruh u Rev. K. Jitem, u Rev. BS Syiemlieh, u Rev. K. Nongkynrih bad kiwei kiwei.
Ïa ka jingrakhe pynkut ïa ka Jubilee yn pynlong ha ka 26 tarik mynta u bnai. Na ka liang ka Balang ka kyrpad ïa baroh ki Khun ka Balang ban ïapoi lang sha kane ka jingrakhe pynkut ïa ka Jubilee.
