Shillong, Naiwieng, 23: U Myntri Khynnah uba peit ïa ka tnat Micro, Small and Medium Enterprises, u Bhanu Pratap Singh Verma un sa ïa shim bynta ha ka Viksit Bharat Sankalp Yatra (VBSY) ka ban long ha ka 24 tarik bad 25 tarik mynta u bnai ha kane ka jylla Meghalaya.
U Myntri un sa ïashim bynta ha ka prokram VBSY ka ban long ha ka shnong Tynring kaba hap hapoh ka East Khasi Hills District. Ha ka sngi Saitjain, u Myntri un ïashim bynta sa ha kawei ka prokram VBSY ha shnong Laitkseh.
Ka Viksit Bharat Sankalp Yatra ka dei ka sienjam ha kylleng ka ri ban ai jingtip bad pynkupbor ïa ki briew jong ka ri shaphang ki skhim ba kongsan jong ka Sorkar bad kane ka Yatra ka dei kaba dang pyntreikam mynta ha saw tylli ki distrik ka Meghalaya ha ka bynta kaba nyngkong jong kane ka jingpyntip paidbah.
Ïa kane ka Yatra la plié paidbah da u Myntri Rangbahduh ka ri u Narendra Modi ha ka 15 tarik mynta u bnai ha Khunti, Jharkhand, ha kaba la pyllait paidbah shibun tylli ki kali na ki jaka bapher bapher ba don bun ki riewlum bad kiba la poi sha palat 1 lak ngut ki briew bad 259 tylli ki Gram Panchayat ha ka sngi kaba nyngkong.
Ka thong jong ka Yatra ka dei ban ai jingtip shaphang ki skhim ba kongsan jong ka Sorkar bad ban pynurlong ïa ka jingpyntreikam pura ïa kine ki skhim. Kane ka sienjam ka pynshlur ïa ki briew ba kin ïashim bynta ha ka roi ka par jong ka ri.
