Shillong, Naiwieng 23 : Ka Khasi Student’s Union ha ka sngi Palei ka la leit ban khang khyrdep bun ki jaka treikam kynthup naduh ki bank, ki ophis bad ki jaka pule hadien ba ka la lap ba ki treikam bad plie ha ka sngi ba ka jylla ka rakhe ïa ka Seng Kut Snem, kaba dei ka jinglehniam jong ka Jaidbynrïew Khasi kaba ju pynlong man la u snem.
Ka jingtuklar jong ka seng ka long halor ka nongrim ba kitei ki jaka treikam ki plie watla na ka liang ka sorkar ka la dep ban pynbna ïa ka kum ka sngi shuti.
Na ka liang ki nongïalam ka KSU ki la leit ruh ban khang ïa ka post office ha Mairang kaba don ha Easten West Khasi Hills namar ba ka treikam bad plie ha ka sngi ba la pynbna ba kadei ka shuti namar katei ka sngi lehniam.
Katba ka KSU Shillong Mihngi Circle pat ka la leit ban kynduh ïa ki nongpynïaid jong ka North Eastern Institute of Ayurveda and Homeopathy (NEIAH) bad National Institute of Fashion Technology (NIFT) da kaba kyntu ïa ki ba ki dei ban khang noh mardor ïa ki jaka treikam ha katei ka sngi.
Ha kajuh ka por ka seng ka la leit ruh ban phah khang ïa ki bank bad ki ophis ha Mawlai. Ki nongïalam ka seng ki la pynpaw ba ka jingplie bad ka jingtreikam jong ki ophis bad jaka pule ha kane ka sngi ka paw ba kim burom ïa ka jaidbynrïew trai khasi trai muluk jong ka jylla. Ki la pynrem ruh ïa kito ki ophis bad jaka pule kiba plie ha katei ka sngi khraw kaba ka jaidbynrïew baroh kawei ka kheiñ burom.
