Phuh phieng ka jingrakhe Seng kut Snem jong ka Seng Khasi Kmie

Shillong, Naiwieng 23: Ka Seng Khasi Kmie, ha ka sngi Palei ka la rakhe ïa ka Seng Kut Snem kaba 124 da kaba sdang da ka jingleh niam, ka nguh na dem ha Ïing Seng kaba don ha Mawkhar ha ka por mynstep bad pynlong ïa ka jingrakhe ha madan Weiking, Jaïaw.
Ha kane ka sngi la pynlong ruh ïa ka jingïaid paidbah bad ka jingïaid pyni Riti da ki Tabut na Madan Ïewrynghep sha madan Weiking bad hangne la pynlong ïa ka jingïalang, da kaba sdang shuwa ka duwai ka phirat lyngba ka kynhun ki Tymmen ki San jong ka Seng Khasi Kmie.
La kren pdiang burom da u Rgh. Oplysor Pyngrope uba dei u President, Seng Khasi Kmie, ka jingkren na u Rgh. Keringland Wahlang President, Seng Khasi Lawbah, Rgh. Chandlok Dkhar Chairman, Art and Culture Committee Seiñ Raij Jowai bad ka jingkren ai khublei na u Rgh. Hainess Marbaniang General Secretary, Seng Khasi Kmie.
Ha kane ka sngi ki khun Khasi Khara na kylleng ka Ri Khasi bad Jaiñtia ki la ïa poi sha kane ka jingrakhe kaba 124 snem ka Seng kut Snem ban pynphuh pynphieng ïa kane ka sngi ha kaba la don ki jingshat bad ki jing rwai da ki kynhun bapher bapher na ki shnat ka Seng Khasi.
Ka Seng Khasi Kmie ha kane ka sngi ka la pynkup burom ruh ïa u samla Philip J. Khongsngi uba shong ba sah ha Wahingdoh uba la ai sngewbha ïa ka seng Khasi da ka jaka ba 6 acre ha Mawpdang, New Shillong bad kumjuh ruh ïa ka kmie kaba la wan ban synran lang bad ïashim bynta ha kane ka jingrakhe ïa ka Seng Kut Snem.
Nalor ki Rangbah jong ka Seng Khasi, la wan ban ïashim bad sakhi lang ruh ïa ka Seng Kut Snem 2023, ba kynthup u Justice HS Thangkhiew, Judge ka Meghalaya High Court, Pa’iem Ainam Manik Syiem, Syiem ka Hima Mylliem, Pa’iem Balajied Sing Syiem, Syiem Hima Khyriem, Bah Pynïaid Sing Syiem, CEM ka KHADC, Bah Adelbert Nongrum MLA ka North Shillong, Kong Matsiewdor War Nongbri, ki nongïalam jong ki sengbhalang bad kiwei kiwei.
La pynphuh pynphieng ha kane ka sngi lyngba ki Cultural programme.