Pynsangeh shwa ka Sorkar Jylla ïa ka jingïalang bad ka HPC halor ka ishu Them Ïew Mawlong

Shillong, Naiwieng 23 : Ka sorkar jylla ka la pynkynriah noh sha ka taïew ban wan ïa ka jingïalang kaba la thmu ban pynlong bad ka Harijan Panchayat Committee ban ïakren halor ka ishu pynkynriah noh ïa ka Sweeper’s Colony na Them Ïew Mawlong.
Ka sorkar jylla dang shen ka la pyntip ruh ïa kane sha ka Meghalaya High Court halor ka rai jong ka ban khot ïa ka HPC ban ïatai halor katei ka mat ha ka 15 ne 16tarik Naiwieng.
“Ngi la pynkhreh ban khot ïa kren bad ki ha kane ka taïew hynrei ka paw kumba katto katne ngut ki dkhot jong ka HPC kim lait. Kumta, ngi la rai ban khot noh ha ka taïew ban wan,” ong u Symbud Myntri Rangbah ka jylla, Bah Sniawbhalang Dhar.
Na ka liang jong u, u la pynpaw ruh ïa ka jingdon jingkyrmen ba ka jingïakren kan long kaba seisoh. “Ngi la pyrshang ban poi sha katei hi ka thong. Kumta ngi kyrmen skhem ba ka jingïalang kaban wan kan long kaba jop,” u la ong.
Halor ka jingkylli, u Bah Sniawbhalang u la ong ruh ba ka HPC ka la pynpaw ba ka jingheh ki kamra ba tyrwa da ka sorkar ki long kiba rit. “kumta, ngin sa sngap ïa ka jingkyrpad jong ki bad ngin sa shim ïa ka rai hadien kata,” u la bynrap biang.