Ym nud leh ei ei ka NPP ba thad u Myntri ba shah thong pisa haduh 5 klur tyngka

Shillong, K’Lyngkot 04 : Ka Congress kaba don ha ka Liang Pyrshah, ha kane ka sngi Balang ka la kynnoh ba ka NPP kam nud satia ban pynshai halor ka jingthad pyrthei da uwei na ki Myntri ka sorkar jylla,Bah Banteidor Lyngdoh ba dei ruh u MLA ka PDF na Mawkynrew ba u shah thong haduh 5 klur tyngka ban wan ïakhun noh na ka tiket NPP ha ka elekshon ban wan.
Haba kren bad ki lad pathai khubor, u kyrtong ka Congress na Shillong North ba dei ruh u Myntri barim ka sorkar jylla, Bah JA Lyngdoh u la ong ba u Myntri Rangbah ka Jylla, Conrad K Sangma kumjuh ruh na ka liang ka NPP ka la dei ban kyntu ïa u Bah Banteidor ba u dei ban pynshai ym ba kin shu sngap jar ïa katei ka jingkynnoh jong u.
“Lada ka NPP ka ong ba ka jingkynnoh jong utei u Myntri kadei kaba bakla, lada um panmap ki lah ban weng noh na ka shuki Myntri ban pynshisha ba phim shym la donkti,” u la ong.
U la kynnoh ruh ba ka don ka jingsam pisa da ki kyrtong ka NPP kylleng kylleng. “Kumta wat tharai ba phi lah ban pynbiej ïa ki paidbah ka Meghalaya da ka bor pisa. Nga nud ban ong ïa phi ba ka bor pisa kan ym treikam satia namar kan don ka jingkylla kaba jur ha ka elekshon MLA ha u 2023,” u la ong.
Na ka liang u Bah Ronnie V Lyngdoh, Nongai ktien ka Congress ba dei ruh u MDC ka Mylliem u la ong ba ki paidbah ki la dei ban sngewthuh mynta ba ka politik kadei ka ïap ka im jong ki bad ki khun ki kti ym ban shu shet kylla ïa ka pateng ban sa wan tang namar ba ki ïoh pisa.
Halor ka jingkylli, la ma u ruh u shah tyrwa lang ban leit pynïasoh sha kiwei ki seng saiñpyrthei, ka jubab kaba u ai ka long, “Ngi skhem ka nongrim bad ngin ym shah rong noh ha ka bor jong ka pisa namar ngi don hangne ban shakri ïa ki paidbah bad ban ai ïa ka lawei kaba phyrnai na bynta ki samla bad ka pateng ban sa wan.”
Ha kajuh ka por, u Bah Ronnie, u la kyntu ïa ki paidbah ba ki dei ban kyntait noh mardor ïa ki MLA kiba ryngkoh na kawei ka party sha kawei pat bad ki bym don ïa ka nongrim ban kren na ka bynta ki mat kiba ïadei bad ka roi ka kiew bad ka jingeh kaba ki paidbah ki ïa kynduh ha ki Constituency.