Ym myntoi ban phah ïa ka VPP sha Parliament yn ym poi shong Dorbar baroh 5 snem ba pyrshah kren Hindi : Dy CM

Shillong, Lber 7 : U President ka National People’s Party (NPP) ka Jylla bad Symbud Myntri Rangbah u Bah Prestone Tynsong mynta ka sngi Palei ula ong ba ym don jingmyntoi ban phah ïa u kyrtong ka Voice of the People Party (VPP) sha Parliament namar kan long shisha tang ka jingsepei kaba khraw bad ka daw ka long ba un ym poi shong Dorbar baroh 5 snem ba pyrshah ban kren ktien Hindi.
Une u Nongïalam ka NPP ula kyntu ïa ki paidbah ka Ri-lum Khasi bad Jaintia ba kin ym ngop ha ki jingpynbiej bad jingphon jingpah ka VPP namar kine ki juh ki briew kiba pyrshah ban kren Hindi u Lat hapoh ka Assembly hynrei ki dei kine ki juh kiba kwah leit sha Parliament ha kaba kiba bun bah ki MP ki kren beit da ka ktien Hindi.
Haba kren ha ka 3rd State Youth Conference jong ka National People’s Youth Front(NPYF), u Bah Prestone ula ong “Dang shen uwei u briew ula pynsngew ba lada ngi phah ïa ka VPP sha Parliament, une u MP un shu mih jyndat beit ïing Dorbar bad yn nym poi shong dorbar baroh 5 snem. Balei? Namar ka VPP kan pyrshah ha Parliament ïa baroh ki MP ba kren ktien ktien”.
“Namar kata, ngi dei ban mih nangne bad pynsngewthuh ïa ki paidbah ba ki dei ban kyntait ban ai vote khamtam ïa u kyrtong ka VPP, uba ïeng pyrshah ïa ka jingkren ktien Hindi namar un sa mih jyndat beit na Parliament. Lada phi mih jyndat, kaei pat phin kren ha Parliament, kan shu long sepei kai lut” ula ong haba kyntu ïa ki paidbah ka Shillong Constituency ba kin kyndit thiah na ba ka por ka dang don ïa ki ban ym shah pynbiej ha kum kane ka party.
Haba kren halor ka jingmih jyndat ki seng saiñ pyrthei ka Liang Pyrshah ha ka Dorbar Mang Tyngka ba dang shu dep, u Bah Prestone ula ong “Ngam dei nga uba ong ïa ka hynrei kila ïohi ïa ka kam ba ki la leh hapoh ka ïing. Ngam shym la thok hynrei ki briew ki la ïohi na ka live telecast kaba phalang ba ki dei ki khawpud. Ha ka por ba u Myntri Rangbah u ïeng ban ai jubab (ïa ka mang tyngka) bad ruh ban batai bniah shaphang ka mang tyngka, ha ka nam jong ka Rule, ki la mih jyndat lut man”.
Ula antad ba lehse ki dkhot ka Liang Pyrshah kila peit ïa ka jubab u Myntri Rangbah na ki TV ba la buh hapoh ka kamra jong ka Liang Pyrshah. Hynrei ula pynpaw pat ïa ka jinglyngngoh ba tang u President ka VPP Bah Ardent M Basaiawmoit uba kynnoh ba ka Sorkar ba mynta ka Meghalaya ka dei kaba dap da ki jingartatien suda, kaba mut ba u Bah Ardent u dei tang ma u, uba peit ïa ka jubab u Myntri Rangbah na TV.
Haba kyntu ïa ka Liang Pyrshah ban sngew laitluid ha ka ban pan jingpynshai ïa kane, u Bah Prestone ula ong “Ka kamra u Myntri Rangbah ka dei kaba heh bad ka kamra jong nga ruh ka don marjan bad u, kumta nga kyntu ïa ki ba kin wan shakhmat namar u Myntri Rangbah u dang kloi ban ai sa kawei ka jingbatai”.
Haba kam ba ka Sorkar MDA-2 ka dei kaba buh record thymmai tang ha ki 6 snem, une u President ka NPP Meghalaya ula ong “Ngi la thaw ïa ka record ba thymmai haba phai sha ka mang tyngka, ka jingkynshew pisa, bad ka roi ka par tang hapoh ka hynriew snem. Namar kata, kito kiba ïa hylla kyrkaw ha ki jaka ïew ai ba kin hylla namar ki nang tang ban kren pynheh da kaba shu kren thok bad shukor ïa ki paidbah ym ba ki kren ïa ka jingshisha”.
Ha kajuh ka por, u Bah Prestone ula ong ba ka NPYF ruh ka ïeng ban shakri ïa ki paid Khasi Jaintia haba bynrap “Balei nga ong ïa kane ka long namar ki don katto katne kiba kam ba ki ieid Jaidbynriew palat ban ïa kaei kaei baroh hynrei nga ruh nga ong ba ka NPYF ruh ka dei kaba ieid Jaidbynriew palat ban ïa kiwei kiwei” ula ong.
U pyntip ba ka jingïalang ba heh bha kan sa long ruh ha Adogre ha Ri-lum Garo ha ka 15 tarik Lber, ban pynbit pynbiang ïa ka jingpynkhreh jong ka party na ka bynta ka elekshon Lok Sabha.
Ula kyntu ïa ki nongtrei ka party ba kin trei shitom ha ka ban pynthikna ba baroh arngut ki kyrtong ka Agatha Sangma na Tura bad Dr Ampareen Lyngdoh na Shillong-kin ïoh ïa ka jingjop ha ka elekshon.
“Ngin thaw record ha kane ka kynti ba mynta ba nangne na Meghalaya ngin phah ïa arngut ki kynthei ki ban long ka sur u paidbah ka Jylla sha Parliament” ula bynrap.