Shillong, Nohprah, 13: Ka Hynñiewtrep Petroleum Workers’ Union (HPWU) ka la pynpaw shai ba kam kyrshan ia ka jingiakhih ba la pynlong da ka seng ki driver nongkit umphniang petrol ka North East Petroleum Mazdoor Union (NEPMU) kaba la sdang ban pynlong naduh mynnin ka sngi Hatmajai.
Haba kren sha u nongthoh khubor u bah R. C. R Kharsyntiew, general secretary ka HPWU u la pynpaw ba kim kyrshan daleilei ia kane ka jingiakhih jong ki bad ki kyrpad ruh na ki NEPMU ba kin weng noh ia kane ka Strike ne jingiakhih jong ki naba ka ktah ia ka jylla Meghalaya ha kum kine ki por jong ka jinglehkmen Khristmas kaba ki paidbah nongshong shnong ki leh ha une u bnai.
U iathuh ba kane ka seng na Assam ka NEPMU ka la phone sha ki, ia kaba ki la pan jingkyrshan, hynrei ma ki kum ka seng napoh ka jylla kim sngewiahap ban kyrshan, naba ki pynlong ia kane ka jingiakhih na ka bynta kito kiba la shah kem, kiba kum ka seng kim sngewdei ban kyrshan bad u la ong, ai ba ka ain kan leh ia kaba donkam, naba kum ka seng ki la dep kren shai ba kim kyrshan ia kino kino ki kam beain bad ka moto jong ki ka ong, “Trei Hok la ka Kam,”.
U pynpaw ruh ba kane ka dei ka por lehkmen Khristmas ki riewngeit Khristan, kumta kim sngewdei ban pynlong jingiakhih, wat ma ki ruh kin sngew kumno lada pynlong jingiakhih ha ka por lehniam puja jong ki, bad kane ka lah ban wanrah ban ia ka jingiasngew pher niam, kaba kum ka seng kim kwah ba kan long kumta.
“Kumta kum ka sngi ngi kyrpad ia ka NEPMU ba kan weng shuwa ia jingiakhih ban ym pynthud ia ka lehkmen Khristmas ka jong ngi hapoh kane ka jylla,” bynrap u General secretary ka HPWU.
U la iathuh ruh ba ki la shim ia kane ka rai ha ka jingialang bakyrkieh jong ki hynne ka sngi Balang.
