Ym kwah ka VPP ban shah tehlakam ha kiwei ki party, yn ïeng marwei ha ka Liang Pyrshah

0

Shillong, Lber 19: U President ka Voice of the People Party (VPP) u Bah Ardent Miller Basaïawmoit ha ka sngi Saitjaiñ u la ong ba ka VPP ka la rai ba kan shong ha ka Liang Pyrshah ha iing dorbar hynrei ka jingshong Liang Pyrshah kan long beit la ka jong khlem ïasnoh bad kino kino ki kynhun Liang Pyrshah khang ban ïoh treikam laitluid kum ka party ha ka Liang Pyrshah.
“Ngi la rai ban don beit ha ka Liang Pyrshah bad kane ka la shai bha bad ka jingdo jong ngi ruh kan long beit la ka jong khlem pynïasnoh bad ka kynhun jong kiwei ki party khnang ban pynsah ïa ka jinglong kyrpang jong ka VPP bad ruh ba lada don kino kino ki mat kiba ngim mynjur bad kiwei pat ki seng saiñ pyrthei kiba don ha ka Liang Pyrshah ki rah kan yn don jingktah ïa ngi,” ong u Bah Ardent ha ka jingïakren sha ki lad pathai khubor.
Haba kylli pat la ka VPP kan leit isnoh bad ka sorkar NPP lada ka wan ka jingtyrwa, “Ngin ym leit ïasnoh satia bad ka NPP lada don kata ka jingtyrwa kumba phi la kylli namar ki nongrim jong ngi kim ïahap bad ki,” u la jubab.
Haba kylli la ka VPP kan kloi ne em ban leit thaw sorkar lada ka don ka jingpyrshang na ki seng riewlum, “ngin peit lada ka don kum kata ka khep aiu ngin leh hynrei lada dei ba ngi leit ruh ki 15 tylli ki kyndon kiba ngi buh ha kato ka sien ruh kin dei biang ki juh kaba ngin buh lada wan kum kata ka por,” u la ong.

Leave A Reply

Your email address will not be published.