Shillong, Lber, 19: Ka North Eastern Development Finance Corporation Ltd (NEDFi), Shillong ha ka sngi Saitjaiñ ka la lum lang ïa ki briew kiba angnud ban long ki nongsengkam seng jam ha ka shnong Mawngap, East Khasi Hills District ban ai jingpynshai halor ki skhim bapher bapher.
Kane ka jingïalang ka long ruh ban prat lynti bad ban ai jinghikai ïa ki samla ban ieng ha la ki jong ki kjat.
U BM jong ka NEDFi u Bah P.Rymmai u la pynshai ïa ki nongïashim bynta shaphang ka NEDFi bad ki kam jong ka ha kane ka thaiñ Shatei Lammihngi kiba kynthup ka jingai jingïarap ha ka rukum kum ka ram, ka jingïarap kum ka jingai jinghikai ban kham pyntbit ha ki kam lajong ha ka sap ka suh ka thaiñ jingthaiñ bad ka khañi pateng bad kiwei kiwei.
U Business Development Representative u Bah Bhanud Kharkongor u la pynshai kham bniah shaphang ka loan/scheme jong ka shlem treikam ka NEDFi ha Meghalaya.
La ïawer ïa ki nongseng kam lajong ban mih shakhamat ban shim kabu ïa ki skhim bapher bapher jong ka NEDFi bad kumjuh ïa ki skhim bapher bapher jong ka Sorkar India kum ka MOVCDNER, ka National Bamboo Mission, ka MIDH Scheme bad kiwei kiwei.
Shuh Shuh la batai kham bniah shaphang ka North East Venture Fund (NEVF) ka Venture Fund banyngkong eh jong kane ka thaiñ Shatei Lammihngi ba la seng ban kyrshan ïa ki Startup ha kane ka thaiñ.
La ai jingpynshlur ïa ki samla ban peit sha ka jingsengkam la jong kum ki Startup ha Meghalaya ban kyrshan bad ban ai kam aijam ïa kiwei pat ki paradoh parasnam lyngba ka NEVF.
Ki don 32 ngut kiba la ïashim bynta ha kane ka sngi.
