Ud ki paidbah ba jur ka jinglip bording ha nongbah Shillong

0

Shillong, Lber 19 : Ki paid nongshong shnong jongka sor Shillong ki la ud la lyniar namar ba la jur palat ka jinglip bording ilektrik kaba khah khah ha kane ka nongbah bad kaba la neh ruh da ki bun bun kynta. Kane ka jinglip bording ka la ktah jur ïa ki khynnah skul bad ki samla pule kiba dang don hapdeng ka jingïaleh eksamin.
Kiba bun ki paid nongshong shnong khamtam ki kmie ki kpa bad ki samla pule kiba la ujor sha u Mawphor lyngba ka phone ki pynpaw ba lada dei ba la pyntip lypa ne dei kata ka jinghap ban pynlip bording
( Load Shedding) kim sngew ei ei namar ki la ïoh ban pynkhreh lypa ïa ki emergency light ne ki mombati hynrei namar ka jingpynlip ka long kyndit kyndit kumta ka la buh ïa ki ha ka jingeh kaba khraw.
Ki la pynpaw ba kum mynhynnin ruh ka jinglip bording ka long khah khah baroh shisngi bad ha ka por shiteng synnia lei lei naduh ka por kumba 2 baje ei ei la lip syndon haduh kapor mynstep. Nangta mynstep pat naduh kapor 9 baje haduh 4 baje janmiet ka dang meh ka bording ilektrik. Kaba pynbitar ïa ki paidbah ka long mar ïalip bording ki phone ruh la weng lut sharud namar haba ki phone ha ki number ban pyntip ne kylli shaphang ka jinglip bording ki pynpaw ba kim ju ïoh shuh la shu ïoh tang ka jubab ‘not reachable’ ne ‘the number you are calling is not registered’.
Halor kane ka jinglip bording pat haba pyrshang ban kylli na kiba dei peit ïa ka laiñ bording ki pynpaw ba ka daw ka dei ka jingslap nyngkong kumta kiba bun ki jingthut ki la jia ha ki kor ki bor na kata ka daw ka thut bha ka laiñ bording ruh.
Hynrei haba u nongthoh khubor u la wad bniah ka daw ka dei ka jingduna nongtrei bad ynda la miet lei lei kham niar ba kin leit bud dien ïa ka jingsniew ka laiñ bording namar don tang marwei ne arngut ha ki jaka trei.
Halor kane ka jinglip bording ba khah khah ki paidbah ki kyntu ïa u myntri ka tnad pynmih bording ba un shim khia ban khot ïa ki bor pynïaid ban ïakren bad peit ïa ki jingduna nongtrei ne ban tohkit balei ba jur kane ka jinglip bording ha kane ka nongbah. Namar ki paid nogshong shnong ki pynpaw ba lada ha ka nongbah jongka jylla ka dang jia kumne katno tam lei sha ki thaiñ nongkyndong ba lada lip bording kin hap ban shong dum beit da ki bnai lynter.
Ki don ruh na ka liang ki kmie ki kpa jong ki khynnah skul bad samla pule kiba la pynpaw ba lada ka sorkar kam leh ei ei halor kane kim banse ban leit sha ka ïing bishar ruh da kaba ujor mukotduma PIL pyrshah ïa ka tnad MeECL na ka bynta kane ka jingeh kaba ki paidbah ki mad na ka jinglip ba khah khah ka bording ilektrik ha kane ka nongbah.

Leave A Reply

Your email address will not be published.