Shillong, Lber, 19: Ka Dorbar Mang Tyngka jong ka Ïingdorbar Thawaiñ ka ban sdang ha ka Lah Sngi U Blei kan sa sakhi ïa kiba bun ki mat bakongsan ha ka sien banyngkong eh.
Wei, ka dei ka sien shong ba nyngkong jong ka dorbar Mang Tyngka jong ka 11th Meghalaya Legislative Assembly.
Ar, ka dei ka sien banyngkong eh ba u Lat ba thymmai jong ka Jylla u Phagu Chauhan un ai jingkren sha ki 59 ngut ki MLA ba lashah jied thymmai jong ka Ingdorbar kaba Khatwei kiba dang shu jop ïa ka elekshon kaba dang shu dep long ha ka 27 tarik Rymphang.
U Lat un sa ai jingkren sha ki dkhot jong ka Ïingdorbar ha kaba u sa bteng ban ïathuh ïa ki prokram bad ki polisi treikam jong ka Sorkar na ka bynta u snem 2023-2024.
Lai, kan dei ruh ka sien banyngkong eh jong ka Dorbar Mang Tyngka ba u Lamphang ba thymmai jong ka Ïingdorbar Thawaiñ u Thomas A Sangma un sa pynïaid ïa ka dorbar.
Saw, dei ka sien ba nyngkong eh jong ka Dorbar Mang Tyngka na ka bynta kiba bun ki dkhot ba thymmai jong ka Ïingdorbar Thawaiñ kiba dang shu shah jied ha ka sien banyngkong eh. Nalor ka jingpynlong ïa ka dorbar ka ban neh hynñiew sngi kynthih, ki sien shong dorbar ki kynthu ïa ki san sngi ki jingïathir ïatai halor ki kam jong ka Sorkar bad ar sngi ki mat ba la ailad ban rah da ki dkhot jong ka Ïingdorbar.
Ka Dorbar kan sa kut noh ha ka 28 tarik mynta u bnai khyndiat sngi shwa ban poi ka jingkut jong ka Financial Year, khnang ba naduh ka 29 tarik haduh ka 31 tarik ka Sorkar kan dup ïohlad ban pynkhuid lut ïa ki jingsiew pisa kiba dang sah pongding.
Ïa ka Almanak na ka bynta ka sien shong dorbar ka ban sa long la mynjur ha ka jingïalang jong ka Business Advisory Committee (BAC) ba la pynïaid da u Lamphang jong ka Ïingdorbar Thawaiñ u Thomas A Sangma, ha ka taiew baladep.
Kan dei ruh ka sien banyngkong eh ba ka Ïingdorbar Thawaiñ kan long khlem ka jingdon jong u Nongïalam ka Liang Pyrshah.
Ha ka sngi sdang jong ka Dorbar Mang Tyngka, ki dkhot jong ka Ïingdorbar kin sa jied ïa u Symbud Lamphang.
U Symbud Lamphang barim uba long ruh u MLA jong ka Resubelpara u Timothy D Shira u la shah jied ban shimti biang ïa kane ka shuki Symbud Lamphang ha kane ka kynti.
U Shita u la long u Symbud Lamphang naduh u snem 2018 haduh u snem 2023 bad un dang ïai bteng ban bat ïa kane ka shuki naduh ka sngi ba la jied ïa u hapoh ka Ïingdorbar.
