Yn dang shong pyrkhat ka UDP haba ïadei bad ka kam ïabujli shuki Myntri ha ka sorkar MDA

Shillong, Lber 19 : Ka United Democratic Party (UDP) kan sa shim ïa ka rai haba ïadei bad ka jingïa bujli ïa ka shuki Myntri Sorkar hapdeng ki MLA jong ka party.
Lah ban kdew hangne, ka UDP, ka don 11 ngut ki MLA ha ka Iing Dorbar kaba 59 ngut bad mynta ka don tang arngut ki Myntri Sorkar ha ka sorkar synrop Meghalaya Democratic Alliance – 2 ba ïalam da ka NPP.
Kitei ki arngut ki Myntri ki kynthup ïa u Bah Paul Lyngdoh na West Shillong bad u Bah Kyrmen Shylla na Khliehriat.
Ki tyllong khubor ki ïathuh ruh ba ïa ka kam ba ïadei bad ka jingïabujli ïa ka shuki myntri la shaniah ha ka jingstad jong ki nongïalam ka party ban shim ïa ka rai.
“Ha kano ka por ba i donkam ban bujli, kitei baroh arngut ki Myntri kin hap ban pdiang ïa ka rai jong ka party,” ong u nongïalam ka party u bym kwah ban pynpaw kyrteng.
La ong ruh ba katei ka jingïakylliang ka lah ban long hadien shisnem shiteng, lane ar snem bad shisnem. Nalorkata, utei u nongïalam u ai dak ruh ba kito kiba khlem ïoh shong shuki Myntri ha ka samoi ba la dep ki lah ban ïoh mynta ka kynti.
Dang ha ka 09tarik mynta u bnai, u Myntri Rangbah ka jylla, Conrad K Sangma u la pyntip ba u la ïoh pdiang ïa ka shithi na ka BJP bad kumjuh na ka HSPDP kiba la rai ba ïa ka shuki Myntri yn ïa bujli mar shiteng hapdeng jong ki.
Hynrei u la ong pat ba ka UDP kam pat shym la kdew satia ïa katei ha u haba ïadei bad ka jingïa bujli shuki myntri.