Shillong, Jymmang 18 : U Nongïalam ka Liang Pyrshah u Dr Mukul Sangma u la pynpaw ba um kwah satia ba ka jylla Meghalaya kan pawnam ha ka kam ïa khalai ne kino kino ki kam kiba pynhun ïa ki katto katne ki riew saiñ pyrthei hynrei ka dei ban pawnam kum kawei na ki jaka pdeng jong ka pule puthi.
Haba kren bad ki nongthoh khubor u la ong “ Ngim kwah ba ka jylla kan pawnam ne bna nam na ka kam ïakhalai ne kiwei kiwei ki jaitkam kiba pynhun tang ïa ki katto katne ngut hynrei ka donkam ban bna ka nam bad burom kum kata ka jaka ba ki kmie ki kpa kin hun ban phah ïa ki khun ban bteng ïa ki jingpule jongki”.
Ka long kaei kaei kaba sngewsih ban tip ba ka jylla Meghalaya kan bna nam tang ïa ki kam kiba pynhun ïa ki katto katne ngut ki riewsaiñ pyrthei khwan myntoi shimet.
Ula ong “Ka sorkar ka dei ban sngewthuh shai kdar ïa ka jingsngew pyrshah jur jong kiba bun ba lang. Hynrei ki pyrshang ban pynthame ïa ki paidbah da kaba ong ba kin thaw aiñ ha kata ka rukom ba ki nongshong shnong haka jylla kin ym ïoh lad ban ïashim bynta bad yn shah tang kiba nabar. Hato kane kam mut lypa ba ka dei ka jaka ka bym bha ban leit rung hynrei yn shah tang ïa kita kiba wan kai sha kane ka jylla?”.
Kumta na ka bynta ka burom jong U Blei uba la kyrkhu kyrdoh ïa kane ka jylla sngewbha weng noh ïa kane ka jigthmu ban pynthoh bria ïa ka jylla da kine ki kam ïakhalai kiba ka imlang sahlang kam lah ban pdiang satia.
ïa ka Meghalaya Regulation of Gaming Act 2021 kaba la mynjur da ka Kynhun myntri la ïeng pyrshah da kiba bun ki seng kynthup ïa ka Meghalaya United Christian Forum (MUCF)kiba la pynpaw ba kin sngewtynnad ïa kane ka jingthmu ban ithuh noh ïa kane ka kam ïakhalai bad ïa thong online na ka bynta ki nongwan jngoh kai sha kane ka jylla, wat ka seng HSPDP ruh kaba dei ka seng ba ïa synrop ha ka sorkar MDA ka pyrshah ïa kane, pynkut u Dr Mukul.
