Shillong, Jymmang 18 : Ka sorkar pdeng lyngba ka Myntri Khynnah jong ka tnad Social Justice & Empowerment, ka Pratima Bhoumik ha ka sngi Ba-ar ka la plie paidbah ïa ka jingshakri jong ka Composite Regional Centre na ka bynta ban pyntbit bad pynkupbor ïa kito kiba don jingthut ha ki dkhot met, ha ka jingïalang kaba long ha U Soso Tham Auditorium, Shillong.
Ka Myntri Khynnah haba kren ha ka jingïalang lyngba ka video conferencing ka la ai ka jingïaroh ïa ka sorkar jylla kaba la shimkhia ban pynurlong ïa ka CRC na ka bynta ka jingmyntoi jong ki para nongshong shnong ka jylla kiba don ka jinglong ba kyrpang.
Ha kajuh ka por ka pynpaw ruh ïa ka jingkmen halor ka jingai jong ka sorkar jylla haduh 10 akar ka jaka na ka bynta ban tei ïa katei ka Centre ha Umsawli bad ong ruh ba shen ka jingtei kan sa sdang noh.
Ha kane ka sngi u Myntri ka tnad Social Welfare, Bah Kyrmen Shylla u la sam ruh ïa ki tiar ai jingïarap sha ki 55 ngut ki nongïoh jingmyntoi lyngba ka skim ADIP jong ka sorkar pdeng. Ha ka jingkren, u Myntri u la ong ba ka sorkar jylla kan bteng ban kyrshan ïa ka CRC Shillong ba kan lah ban ai ka jingshakri kaba paka tam bad dei na kata ka daw baki la ai ruh ïa katei ka jaka ba 10 akar ha Umsawli.
Na ka liang ka MLA jong ka Shillong East, Dr. Ampareen Lyngdoh ka la banjur ba baroh ki nongshong shnong ka jylla kiba don ïa ka jingthut ha ki dkhot met ki dei ban ïoh ïa baroh ki jingmyntoi na katei ka CRC Shillong.
Ha kane ka sngi la ïoh ruh ïa ka jingkren na ka Anjali Bhawra, Secretary DEPwD, MSJ&E jong ka sorkar pdeng, nangta ruh na u Sampath Kumar, IAS, Principal Secretary, Socïal Welfare, ka SB Marak (MCS) Commissioner for Persons with Disabilities, u Nachiketa Rout, Director, NIEPMD, Chennai, Dr. Roshan Bijlee, Director, CRC- Kozhikode & Nodal Officer jong ka CRC – Shillong.
