Shillong, Jymmang 18 : Ka North East International Fashion Show (NEIFS) ka khot ka wer ïa ki longkmie, ki samla, ki rangbah bad kumjuh ki heprit sha ka lympung ïakob pyni riam kaban long ha ka jylla Assam ha ki bnai ban wan.
Haba pyntip ïa kane, ka Eve Syiemlieh, ka model kaba la wan ba ar ha ka Miss Tourism Queen World Wide kaba long ha Phillipines – 2018 ka la ïathuh ba ha nongbah Shillong ka jingjied ïa kiba tbit ban leit shim bynta ha katei ka lympung kan long ha ka 27tarik mynta u bnai ha Shillong Club.
La pyntip ruh ba kam don satia kano kano ka kyndon ïa ki nongshim bynta hynrei la shah mon sngewbha ïa baroh.
Katkum ka jingïathuh da ki nongpynïaid, lyngba katei ka rynsan kin sa jied pat ïa kiba tbit la ka long ha ka thup ki samla, ki longkmie, ki rangbah ne ki heprit na ka bynta ba kin ïoh pat ban leit shim bynta sa ha ka lympung kaba kham heh kaban long ha jylla Assam kaba yn wan shim bynta da bun ki jylla jong ka Ri kumjuh ruh wat na shabar ri kumjuh.
