Ym don shuh ki dkhot ba thymmai ka NLCN ba shah kem

0

Shillong, Nailar 20 : Kam shym la don shuh kano kano ka jingkem ïa ki dkhot jong ka kynhun lehnoh ba thymmai ha ka jylla, ka National Liberatioin Council of Nongkyndong (NLCN).
“Ngim shym la ïoh kem shuh,” ong u Deputy Inspector General of Police (Eastern Range), Davis NR Marak haba kren ha kane ka sngi U Blei.
Lah ban kdew hangne ba ki la don haduh 11 ngut ki dkhot jong katei ka kynhun lehnoh ba thymmai kynthup ïa ki saw ngut ki nongïalam jong ka NLCN kiba la shah kem na kylleng ka Rilum Khasi Jaintia ha kine ki khyndiat sngi.
Na ka liang ka tnad pulit ka la pynjur ruh ïa ka jingkhynra ïa kitei ki dkhot ba thymmai ha kylleng ka thain khnang ban ïoh kem shuh shuh.
Baroh kito kiba suba ba ki dei ki dkhot jong katei ka kynhun la wanrah ïa ki sha Shillong bad ïalam ïa ki sha iingkashari bad mynta ki don ha along ki pulit na bynta 8 – 10 sngi.
Arngut na kitei ki dkhot kynthup ka longkmie ki don mynta ha hospital.
Ki tyllong khubor na ki pulit ki ïathuh ruh ba shen yn sa kem shuh ha kine ki khyndiat sngi ban wan.
Dang ha ka taiew ba la dep, hadien ba la ïoh ban pynpra ïa katei ka kynhun lehnoh ba thymmai, la ïoh ban kem haduh 7 ngut ki dkhot bad uwei u khynnah ba dang rit rta na East Khasi Hills.
Kitei ki kynthup ruh ïa saw ngut ki nongïalam ba kam ïalade kum u chairman, commander-in-chief, general secretary bad area commander West Khasi Hills, area commander Jaintia Hills bad ruh ki dkhot.
Ka khubor na ki pulit ka ong ruh ba katei ka kynhun ka la ïateh ruh bad kawei pat ka kynhun lehnoh na Nagaland bad ki thmu ban sdang ïa ka jingleit shah hikai kaba nyngkong jong ki sha Nagaland haka 17tarik u Nailar.
Katei ka kynhun ka buh thong ruh ban pynrung dkhot haduh kumba 1500 ngut ei ei kiba ka thmu ban phah shah hikai sha Nagaland.

Leave A Reply

Your email address will not be published.