Shillong, Nailar, 20: Ka jingïalang jong baroh ki Cordinators na kylleng ki jylla jong ka Ri India hapoh ka shatri jong All India MSP Gurantee Kissan Morcha (AIMGKM) kaba la long ha ka New Delhi ha ka ka sngi Saitjaiñ ka la rai ban ym ïashim bynta ha ka jingthep vote ha ka elekshon Lok Sabha ka ban sa long ha u snem 2024 lymda ka Sorkar NDA ba ïalam da ka Bharatiya Janata Party (BJP) kam pyntreikam ïa ka Minimum Support Price (MSP).
Kane ka jingdawa ka long ruh ba ka Sorkar Pdeng ka dei ban kynthup ruh ïa ka dor kyrshan kaba jem ne Minimum Support Price (MSP) na ka bynta ki jhur u soh bad ka dud
Kane ka jingïalang jong baroh ki nongïalam jong ki nongrep ka la sawa jam ha ka nongbah Delhi bad ki nongrep ki la byrngem ban ïakhih tyngeh bad kloi ruh ban mih sha surok lada ka Sorkar ka dang sngap mynthi halor kane ka mat, la ïathuh u Bah Alfondbirth Kharsyntiew uba long ruh u Coordinator uba mihkhmat ïa ki phra tylli ki Jylla jong ka thaiñ Shatei Lammihngi.
a Ha ka jingïalang, la pyrta ïa ka slogan, “No MSP, No Vote,” bad la ïathir ïatai sani ruh da ka jingsngewkhia ïa ka jingïakhih ha ka jylla Manipur bad ka jingshah ktah ki nongrep ha kane ka jylla .
Ki nongrep ha ri India ki long shi tylli bad ki sngewkhia ïa kaei kaba la jia ha Manipur bad ki nongrep ki kyrpad ïa ka Sorkar Manipur bad ïa ka Sorkar India ban shimkhia khnang ba yn lah ban wanrah biang ka jingsuk ha ka jylla Manipur.
“Ngi kwah ba ki nongrep kin leit phai biang sha ki lyngkha jong ki kumba ju long ka jingim kaba manla ka sngi,” ong u nongïalam Bah Kharsyntiew.
U VM Singh uba dei u Convener bad u Coordinator jong ka Jylla Uttar Pradesh ruh u la ai jingkren ban pynshai paidbah halor kane ka mat jingdawa jong ki nongrep na ka Sorkar Pdeng.
