Nongstoiñ, Nailar, 30: Katba kiwei kiwei ki nongmihkhmat kiba dei na ka Congress bad kiwei ki seng saiñ pyrthei, ki dang leit ban rung noh ha ka National Peoples Party, u bah Kimfa S.Marbañang MLA barim ka Rambrai Jyrngam u ba la leit pynïasoh naduh ki snem ba la dep ha shuwa ka MLA Election 2023 pat u la babe kylla, ong u Bah Bormanding Nonglang President ka District Congress Committee West Khasi Hills.
Halor kane ka bynta u Bah Bor u la pynpaw shai ha ka jingïakren bad u nongthoh khubor da kaba u la kubur ba ka long kaba shisha katkum kaba la saphriang khubor kylleng sawdong ba u bah Kimfa u kwah ban wanphai biang sha ka sem jong ka Congress.
U bah Nonglang u la ong ruh ba kam dei tang ka hamsaïa, hynrei u bah Kimfa dalade u la wan ban ïakynduh markhmat bad u bah Nonglang ban pynsngew ïa katei ka jingkwah jong u ban wan phai biang sha ka party.
Haba kylli pat ha kaba ïadei bad ka election MDC ka ban sa long ïano ka Congress kan ai tiket, u bah Nonglang u la ong ba na ka bynta ka Rambrai Jyrngam Constituency ma u hi un dei u kyrtong MDC bad u la pynthikna ba 100/% ba ïa ka elekshon MDC u hap ban ïaleh hi. Utei u nongïalam ba rangbah jong ka Congress ha West Khasi Hills, u la ong ruh ba jin lada dei ba ka MPCC kam shym pat la sospon ïa u Bah Kimfa haduh san snem, ka dang don ka lad ban ïakren sngewthuh jingmut. Kiwei pat ki tyllong khubor lyngba ki riew paitbah bad ki nongbud ba jan bha bad u bah Kimfa, ki la ong ba ha kane ka MDC elekshon u bah Kimfa u kwah ban mih madan kum u kyrtong na ka NPP lane lada um ïaleh na ka NPP ruh u lah ban ïaleh kum u kyrtong shimet party.
