Nongpoh, Nailar 30: U Bah Marcus Marten mynta ka sngi u la pynshai paidbah halor ka jingkynnoh pyrshah ïa u kum u President ka Nongpoh Region Auto Drivers and Owners Association (NRAODA) bad ïa kiwei ki nongïalam ba u la thiah lyngngai la 13 snem bad ha ka jingshisha ka seng kam shym la ioh thiah lyngngai bad ka ai ka jingshakri na ka bynta ka bha ka miat jong ki para driver bad ki trai ka Autorickshaw.
Haba kren mynta ka sngi sha ki lad pathai khubor, u Bah Marcus Marten u la ong ba kane ka jingkynnoh pyrshah ïa ki nongïalam ka la mih tang tang da ki katto katne ki Unit bad kum u nongïalam u hap ban shim ïa ka jingkitkhlieh ha kaba ka jingdon ka seng ka long ban peit lut ïa ka bha ka miat jong baroh ki para driver bad ki trai Auto.
U la pynshai ruh ba kum u nongïalam naduh ba u la shimti kum u President ha u snem 2009 u la ai ïa kata ka jignïatrei lang na ka bynta ban peit ïa ka bha ka miat ki para driver bad ki trai Auto bad kane ka jingkynnoh khamtam ha kaba ïadei ba ka pisa kim lah ban ai ïa ka sakhi ba la lum pisa bad kine baroh ki jia ki dei tang na ka daw ka jingmih ki katto katne ki unit kiba pyshah bad ki la ju leh ruh ïa kano kano kam khlem da kynjoh ktien ïa ki nongïalam kumba ki la pynlong ïa ka jingtalasi ïa ki Auto Rickshaw dang shen ha Nongpoh khlem da pyntip sha ki nongïalam halor kata ka jingkynnoh ba don kita ki Dribar Auto ba dih drok bad rah bor ïa ki kynthei ki khynnah.
Shuh shuh, u la ong ruh ha ka jingshisha la don ka khem ba u la thmu ban shongthaid noh kum u President bad dei ki nongïalam hi kiba la pynbor ban bat biang ïa ka kam kum u nongïalam bad mynta pat tang na ka daw ka jingthud jong kano kano ka unit kim shym la wan sha ki nongïalam bad ki la shut had pynban sha ki lad pathai khubor kaba ym dei satia kata ka rukom treikam hapoh ka seng.
