Bitar ki nongñiah Auto Rickshaw ba phet jyndat u Preisident bad khlem ban lah pynshai ïa ki jingdawa
Nongpoh, Nailar 30: Ki Dribar Autorickshaw ka thain Nongpoh mynta ka sngi ki la pynpaw ïa ka jingbitar bad ka jingpynrem jur ïa u President ka Nongpoh Region Auto Owners and Driver Association (NRAODA) u Bah Marcus Marten, kaba dei hadien ka jingbym lah ban pynshai ïa ki jingdawa bad ruh u la shu phet jyndat na ka jingkhot ïa kren ha surokbah NH-6 khlem da lah ban pynshai ïa ki mat jingdawa ba la buh da ki dribar Auto Rickshaw ka thain Nongpoh.
Kum ban pynkynaw, ka kynhun ki Autorickshaw na ka thain Nongpoh dang shen ki la ai por 10 sngi ban pynshai ïa ki jingdawa, ha kaba u President ka sengkmie u khlem lah ban pynshai satia bad hadien kata ki la ai por biang sa 5 sngi kumba la mih ha ki lad pathai khubor bad dei hadien mynta ka sngi u la khot tang kattto katne ki briew kiba u don ïadei da ka jingthmu ban pynshai halor ka jingkynnoh pyrshah u bad hadien ba la wan poi ki kynbun ba pyrshah ïa u, u khlem lah satia ban pynshai bad u la shu phet jyndat noh ïa lade na katei ka jaka kaba u khot ha ka surokbah.
Kum ban pynpaw ruh dang shen, kane ka jingdawa kitei ki dribar Autorickshaw ka long ban pynlong noh ïa ka general meeting na ka bynta ban pynthymmai ïa ki nongkitkam bad kumjuh ruh ban ai jingkhein jingdiah halor ka jinglum pisa na ki Autorickshaw bad kane ka jinglum jong u mynta ka sngi tang ïa ki katto katne ngut ki dribar Autorickshaw ka la pulom noh hadien ba la wan ka kynhun kiba la pyrshah bad kiba ym hun satia halor ka jingtreikam jong u ba la 13 snem ei ei khlem da lah ban pynshai kumba ki la dawa.
Na ka liang kine ki kynhun kiba kwah ïa ka jingpynshai, ki la pynrem jur ruh ïa Bah Marucs Marten kum u President ka sengkmie, uba la khot ïa kren pynban ha surok, ha ka jaka ban un khot ïa kren ha ki jaka kiba biang khnang ban ioh ban ïa tai ïa ki kam sahteng ba la 13 snem ei ei khlem ai jingkhein jingdiah ne lum jingïalang kaba dei kawei na ka mad ba ki Dribar Autorickshaw ki la pyrshah jur.
Kine ki kynhun dribar ki la pynpaw ruh ba kim hun satia ïa ka jingkren utei u President bad ki daw aba dei ban pynshia shuh shuh bad dei ban khot da ka jingïalang kaba paka bad ym ha lynti syngkien bad lada ym lah ban pynshia ne pynbeit ïa kane ka kam kumba la dawa khamtam ka general meeting bad ki jingkhein jingdiah kum ki para driver kim banse ban ïaid noh da kawei ka lynti.